Shomurodov va “Roma” — Chempionlar ligasi uchun hal qiluvchi kurashda

Italiya A Seriyasida mavsumning so‘ngiga yaqin taqdiri hal bo‘ladigan o‘yinlar ketma-ketligi davom etmoqda. Yevropa Chempionlar ligasiga yo‘llanma olish uchun da’vogar jamoalardan “Yuventus”, “Roma” va “Latsio” 37-turda muhim ochkolarni qo‘lga kiritishdi. Ammo ayni shu turdagi eng ta’sirli bahs Rimda bo‘lib o‘tdi — Klaudio Raneri boshchiligidagi “Roma” “Milan”ni 3:1 hisobida mag‘lub etdi.

Bu o‘yin nafaqat chempionat nuqtayi nazaridan, balki Ranerining rimliklar bosh murabbiyi sifatida o‘z uyidagi so‘nggi uchrashuvi sifatida ham katta ahamiyat kasb etdi.

Eldor Shomurodov — asosiy tarkibda va markazda

O‘zbekiston terma jamoasi sardori Eldor Shomurodov bahsni asosiy tarkibda boshlab, 84 daqiqa davomida maydonda faol harakat qildi. Uning kurashchanligi, tinimsiz yugurishlari va raqib himoyasiga ko‘rsatgan bosimi barcha tomondan alohida baholandi.

Bir necha italiyalik sport tahlilchilari Shomurodovning harakatlariga quyidagicha baho berishdi:

VOCEGIALLOROSSA.IT: "Tinimsiz, bosimli va jonkuyar harakatlar ko‘rsatdi. Achinarlisi, to‘liq gol bilan yakunlay olmadi."

CALCIOMERCATO.COM: "O‘yinni sust boshladi, lekin ikkinchi taymda juda faol va ta’sirli harakat qildi."

SIAMOLAROMA.IT: "Gol urish imkoniyati yetishmadi, ammo ko‘p yugurdi va muxlislar uni olqishlab kuzatishdi."

ROMAFOREVER.IT: "Jamoa manfaati yo‘lidagi mehnatini qayd etish lozim. Yakuniy zarbada omadi kelmadi."

“Roma” uchun hal qiluvchi palla

Rimliklar bu g‘alaba orqali jadvalda beshinchi pog‘onaga ko‘tarilishdi va endi so‘nggi turda “Torino”ga qarshi bahsda Chempionlar ligasi uchun so‘nggi imkoniyatlarini sinab ko‘rishadi. Buning uchun "Roma" safarda g‘alaba qozonishi, shu bilan birga "Yuventus"ning “Venetsiya” maydonida ochko yo‘qotishi kerak bo‘ladi.

Raneri ta’siri va Shomurodovning o‘sishi

Ma’lumki, Eldor mavsum boshlarida zaxira futbolchisi sifatida ko‘rilardi. Ammo Klaudio Raneri bosh murabbiy sifatida klubni qabul qilgandan so‘ng Shomurodovga ishonch oshib bordi. Ayniqsa, mavsumning hal qiluvchi pallasida u jamoa asosiy yuragiga aylandi.

Uning faol harakatlari, tayyorgarlik darajasi va jamoa uchun ko‘rsatayotgan sadoqati italiyalik mutaxassislarning ham e’tiboriga tushib, ijobiy fikrlarga sazovor bo‘lmoqda.

Zamin.uz tahririyatidan:
Shomurodovning yuqori saviyadagi maydonlardagi harakatlari uning faqat mahalliy yulduz emas, balki Yevropa darajasidagi to‘liq shakllangan hujumchiga aylanayotganidan darak beradi. Endi esa barcha diqqat “Torino”dagi so‘nggi turga qaratiladi.

Siz “Roma” va Shomurodovni Chempionlar ligasida ko‘rishni istaysizmi? “Zamin”ni Telegramʻda oʻqing!