Farzona Fozilova Tailanddagi musobaqa finaliga yo‘llanmani qo‘lga kiritdi!

Xabaringiz bor, 24 may kuni Tailand poytaxti Bangkok shahrida jahonning eng mahoratli charm qo‘lqop ustalari ishtirokida nufuzli "Thailand Open" xalqaro boks turniri start olgan edi. Mazkur turnir 1 iyun kuniga qadar davom etadi va hozirda eng muhim bosqich – yarim final bahslari boshlanib ketdi.

Yarim final doirasida, bugun mamlakatimiz sharafini himoya qiluvchi vakillarimizdan biri, -48 kg vazn toifasida ishtirok etayotgan iqtidorli bokschimiz Farzona Fozilova ukrainalik tajribali raqibasi Olga Shalimova bilan to‘qnash keldi.

Jang avvalidan kuchli raqobat va keskin kurashlarga boy tarzda kechdi. Birinchi raunddanoq har ikki sportchi o‘rtasida qizg‘in, hamda jiddiy to‘qnashuvlar bo‘ldi. Farzona Fozilova yuqori mahorat, tezlik va aniq zarbalar orqali o‘z ustunligini namoyish eta boshladi. Ikkinchi raundda ham yurtdoshimiz raqibasidan ustun kelib, hujumkor uslubda harakat qildi va muhim ochkolarga ega bo‘ldi.

Shalimova ham o‘ziga xos taktik usullar orqali vaziyatni o‘zgartishga uringan bo‘lsa-da, Fozilovaning qat’iyatli harakatlari buni imkonsiz qildi. Uchinchi raundda ham hamyurtimiz yuqori darajadagi jismoniy tayyorgarligi va kuchli hujumlari bilan raqibasiga imkon qoldirmadi.

Natijada, to‘liq uch raundlik bahsda hakamlar yakdil qaror bilan g‘alabani Farzona Fozilovaga berishdi. Shunday qilib, Fozilova turnirning eng yuqori cho‘qqisi – final bosqichiga yo‘l olishga erishdi.

Ma’lumot uchun aytish joizki, yana bir vakilamiz Feruza Kazakova bugun Tailand vakili Apisada Tantava bilan hal qiluvchi jangda to‘qnashadi. Bu uchrashuv ham muxlislar uchun qiziqarli va hayajonli o‘tishi kutilmoqda.

Umid qilamizki, ikkala sportchimizning g‘alabali yurishi finalda ham davom etadi va ular o‘zbek boksi obro‘sini yanada yuksaklarga ko‘tarib, yurtimiz sharafini munosib tarzda himoya qilishadi. Farzona Fozilovaning bugungi ajoyib g‘alabasi, albatta, yana ko‘plab yosh sportchilarga ilhom bag‘ishlaydi va mamlakatimizda ayollar boksiga bo‘lgan qiziqishni oshiradi.

Shuningdek, mamlakatimiz muxlislari bugungi kunning ikkinchi yarim finalida Feruza Kazakovadan ham g‘alaba kutishmoqda. Sportchilarimizga hal qiluvchi janglarda ulkan omadlar va g‘alabalar yor bo‘lishini tilaymiz! “Zamin”ni Telegramʻda oʻqing!