"Inter" prezidenti jamoasining "sharmandali" mag‘lubiyatiga qanday munosabat bildirdi?

UYEFA Chempionlar ligasi finalida Parijning «PSJ» jamoasiga yirik hisobda (0:5) imkoniyatni boy bergan Milanning «Inter» klubi rahbari Beppe Marotta o‘z fikrlarini matbuotga bildirib o‘tdi. Musobaqaning hal qiluvchi o‘yinidagi og‘ir mag‘lubiyatga qaramay, Marotta klubning mavsum davomidagi ishini yuqori baholab, bir kechalik muvaffaqiyatsizlik butun jamoaning mehnatiga soya solmasligini ta’kidladi.

— Albatta, bu biz uchun juda og‘ir va qayg‘uli kecha bo‘ldi, — deya o‘z so‘zlarini boshladi Marotta. — Raqib jamoa bizdan har tomonlama ustun edi, ular bugungi g‘alabaga mutlaqo munosib bo‘lishdi. Biz ham, afsuski, shu natijaga munosib edik. Biroq ushbu og‘riqli mag‘lubiyatni butun mavsumning mehnatiga zarar yetkazadigan, barcha yutuqlarimizni yo‘qqa chiqaradigan holat sifatida qabul qilmasligimiz lozim. Biz bugun Yevropaning eng kuchli va eng tashkillashgan jamoalaridan biriga qarshi maydonga chiqdik va ularning darajasiga munosib qarshilik ko‘rsata olmadik.

Marotta bu bosqichga yetib kelish uchun jamoa juda katta ish qilganligini e’tirof etdi. «Inter» bu yo‘lda «Barselona», «Bavariya» kabi kuchli raqiblarni ortda qoldirib, chempionlik uchun hal qiluvchi uchrashuvgacha yetib keldi.

— Bu bosqichga yetishish biz uchun oson kechmadi. Guruh bosqichida va pley-offlarda Yevropaning eng kuchli klublariga qarshi kurashdik va bu kurashlarda faqat iroda va jamoaviy birlik bilan g‘alaba qozondik. Buning uchun futbolchilarimizga va murabbiyimiz Simone Indzagiga alohida minnatdorchilik bildirmoqchiman. Ular bu mavsumda 59 ta o‘yin o‘tkazib, jamoaning yuqori darajada ekanligini butun dunyoga ko‘rsata olishdi. Ularning mehnati va sadoqati barchaga o‘rnak bo‘la oladi, — dedi Marotta.

Shuningdek, «Inter» rahbari jamoaning kelajagi va bosh murabbiy Simone Indzagining klubda qolishi masalasiga ham aniqlik kiritib o‘tdi:

— Simone Indzagi haqidagi fikrimda hech qanday o‘zgarish yo‘q. Uning klub bilan shartnomasi yana bir yilga amal qiladi. Simone o‘tgan to‘rt yil davomida o‘zining yuqori professionallik darajasini isbotladi va jamoani belgilangan vazifalarga erishtirishda katta rol o‘ynadi. Biz kelasi hafta murabbiy bilan uchrashib, mavsum natijalarini tahlil qilamiz. Bir kechalik omadsizlik butun mavsumdagi harakat va yutuqlarni yo‘qqa chiqarmaydi. Biz yanada kuchliroq bo‘lib qaytish uchun saboqlar olishimiz zarur, — deb ta’kidladi klub prezidenti.

Marotta ushbu musobaqada jamoani qo‘llab-quvvatlash uchun safar qilib kelgan muxlislarga ham chuqur minnatdorchilik bildirdi:

— Bu og‘ir kechada ham bizni yolg‘iz qoldirmagan va Myunxengacha yetib kelgan barcha muxlislarga alohida tashakkur aytmoqchiman. Ular bizning haqiqiy kuchi va g‘ururimizdir. Umid qilamanki, yaqin kelajakda biz ularni yana xursand qilishga muvaffaq bo‘lamiz, — deya o‘z so‘zlarini yakunladi Marotta.

Shunday qilib, «Inter» prezidentining so‘zlaridan ma’lum bo‘ladiki, bir kechalik yirik mag‘lubiyat klub uchun yakuniy nuqta emas, balki katta g‘alabalar uchun yangi boshlanish bo‘ladi. Bu, shubhasiz, «Inter» muxlislariga ham yangi umid va kuch bag‘ishlaydi. “Zamin”ni Telegramʻda oʻqing!