“Al-Hilol”dan Teo Ernandesga shov-shuvli taklif: 4 barobar yuqori maosh!

Saudiya Arabistonining eng nufuzli klublaridan biri — “Al-Hilol” Fransiya terma jamoasi va “Milan” klubi himoyachisi Teo Ernandesni o‘z safida ko‘rishni qat’iy istamoqda. Pablo Oliveyra tarqatgan ma’lumotlarga ko‘ra, saudiyaliklar hozirda “rossonerilar” bilan rasmiy muzokaralarni boshlab yuborgan.

Ilk transfer taklifi 20 million yevro miqdorida bo‘lgan va u bosqichma-bosqich oshirilishi mumkin. Ammo bundan-da qiziqarlisi — “Al-Hilol” Teoga mavsumlik 16 million yevro atrofida maosh taklif qilmoqda. Bu — “Milan”dagi hozirgi daromadidan to‘rt barobar yuqori!

27 yoshli mahoratli himoyachi o‘tgan mavsumda “Milan” safida 49 uchrashuvda maydonga tushib, 5 ta gol va 6 ta assist bilan faol ishtirok etgan. Uning hujumga ulanish qobiliyati va texnikasi bilan birga jismoniy baquvvatligi Yevropada ham yuksak baholanadi.

Transfermarkt portali ekspertlari Teo Ernandesning bozor qiymatini 40 million yevro deb baholamoqda. Uning “Milan” bilan amaldagi shartnomasi 2026 yilgacha amal qiladi.

Hozircha “Milan” rahbariyati transfer bo‘yicha rasmiy bayonot bermagan, ammo saudiyaliklar tomonidan taklif qilingan mablag‘lar jamoani jiddiy o‘yga solishi aniq. Agar kelishuv amalga oshsa, Ernandes Saudiya chempionatidagi navbatdagi yulduzga aylanadi. “Zamin”ni Telegramʻda oʻqing!