"Yuventus" va "Milan" o‘rtasida sensatsion transfer almashinuvi kutilmoqda

Italiya futbolida yirik transfer ayirboshlash hikoyasi qayd etilishi mumkin. Turinning "Yuventus" va Milanning sharafini himoya qiluvchi "rossonerilar" o‘rtasida katta kelishuv muhokama qilinmoqda. Bu haqda Italiyaning yetakchi sport nashrlaridan biri — "Sportmediaset" xabar berdi.

Ma’lumotlarga ko‘ra, "Yuventus" klubi "Milan" himoyachisi Fikayo Tomorini o‘z safiga qo‘shib olish niyatida. 27 yoshli angliyalik futbolchi o‘tgan mavsumda 35 ta uchrashuvda maydonga tushib, barqaror o‘yini bilan ko‘pchilikning e’tiborini qozongandi. Turinliklar himoya chizig‘ini kuchaytirish uchun aynan Tomori nomzodini ko‘rib chiqmoqda.

Shu bilan birga, yanada qiziqarli taklif muhokama etilmoqda — turinliklar va milanliklar ikki yulduz futbolchini almashtirishi mumkin. Gap Teo Ernandes va Dushan Vlaxovich haqida ketmoqda. Ma’lum bo‘lishicha, "Yuventus" Teoni transfer qilishga qiziqmoqda, "Milan" esa Vlaxovichni hujum chizig‘ida ko‘rishni istaydi.

Finans masalalari — asosiy to‘siq

Har ikki klub o‘z futbolchilarining transfer qiymatini boshqacha baholamoqda. Turinliklar Vlaxovichni 30 million yevroga baholashmoqda, milanliklar esa Teo uchun 25 million yevro talab qilmoqda. Buning ustiga, maosh masalasi muzokaralarning eng murakkab qismi bo‘lib turibdi.

Teo Ernandes "Yuventus"dan yiliga 6 million yevro talab qilmoqda, bu esa "qahrabo-qoralar" uchun og‘ir yuk bo‘lishi mumkin. Dushan Vlaxovich esa hozirda "Yuventus"da 12 million yevro maosh olmoqda — "Milan" esa bunday mablag‘ni to‘lashga hozircha tayyor emas.

Ikki futbolchining ham shartnomasi 2026 yilning yozida yakunlanadi. Bu esa transfer muzokaralarini tezlashtirishi mumkin, chunki har ikki klub ham futbolchilarni erkin agent sifatida yo‘qotib qo‘yishni xohlamaydi.

Agar "Yuventus" va "Milan" o‘rtasidagi bu kelishuv amalga oshsa, Italiya A Seriyasidagi eng shov-shuvli transferlardan biri bo‘lishi aniq. Muzokaralar natijasi qanday bo‘lishidan qat’i nazar, muxlislar katta intiqlik bilan rasmiy tasdiqni kutib turibdi. “Zamin”ni Telegramʻda oʻqing!