“Dinamo” – “Neftchi” bahsidan so‘ng: Abramov natijalar, yoshlar va kelajak haqida gapirdi

Superliganing 7-turidan qoldirilgan markaziy bahsda “Dinamo” o‘z maydonida “Neftchi”ga 0:2 hisobida mag‘lub bo‘ldi. Uchrashuv yakunlangach, jamoa bosh murabbiyi Vadim Abramov jurnalistlar savollariga javob berdi.

Bosh murabbiy natijalarga izoh berar ekan, “bunday o‘yinlarda barini mayda narsalar hal qiladi”, – deya ta’kidladi. Uning fikricha, “Neftchi”ning har ikkala goli ham futbolda kutilmagan ssenariy bo‘yicha sodir bo‘lgan. “Ayniqsa, ikkinchi golda o‘yinchi to‘pni havolatib uzatmoqchi edi, lekin uning uzatmasi bevosita darvozaga kirib ketdi”, – dedi mutaxassis.

Abramov aytishiga qaraganda, bugun maydonda to‘purar bo‘lgan har ikki futbolchi (Yo‘ldoshev va Ismoilov) o‘z vaqtida aynan uning qo‘li ostida katta futbol eshiklarini ochgan va bugun ular “o‘z ustozini jazolagan”.

Shu bilan birga, murabbiy stadiondagi muxlislar qo‘llab-quvvatlovini alohida e’tirof etdi. “Muxlislar qo‘llashi biz uchun muhim. Ammo natijalar bilan muhitning aloqasi yo‘q. Bu gal maydonda yoshlar ko‘p edi va ulardan birdaniga katta mo‘jizalar kuta olmaymiz”, – dedi u.

Jamoada pleymeyker yetishmasligi masalasiga to‘xtalar ekan, Abramov bu muammoni tan oldi. “Maydon markazini boshqara oladigan o‘yinchi zarur. Ayrim asosiy futbolchilar jarohat sabab safdan chiqqan, ikkinchi davradan oldin yangi nomlar taklif etishni o‘ylayapmiz”, – dedi mutaxassis.

Keyingi mavzu sifatida o‘yin qoldirilgan payt va natija borasidagi muxlislar e’tiroziga izoh berdi: “Hech qanday maxsus kutilgan ssenariy bo‘lmagan. Biz ham, raqib ham bir xil sharoitda tayyorgarlik ko‘rdik. Mag‘lubiyatga o‘zimizni aybdor deb bilaman”.

Abramov jamoaning himoya chizig‘idagi muammolarga ham to‘xtalib o‘tdi: “Ikki nafar asosiy markaziy himoyachi safdan chiqdi, bu esa himoyadagi bo‘shliqlarga sabab bo‘ldi”.

Navbatdagi bahs haqida: “To‘rt kundan keyin “Nasaf”ga qarshi o‘yin. Uyda uchta uchrashuvda g‘alaba qozona olmaslik kulgili bo‘ladi. Chempionatda intrigani saqlash uchun “Nasaf”ni yutmoqchimiz”, – deya o‘z oldiga aniq maqsad qo‘ydi Abramov.

Bir narsa aniq: “Dinamo”da sinovlar davri boshlandi va yoshlardan kuchli natija kutish uchun yana vaqt kerak. Kelgusi o‘yinda jamoa o‘z o‘yin tarzini topa oladimi? Vaqt ko‘rsatadi. “Zamin”ni Telegramʻda oʻqing!