Eldor Shomurodovning “Bashakshehir”ga o‘tishi: terma jamoa uchun xavotir va umidlar

O‘zbekiston milliy terma jamoasining sardori, asosiy to‘purari va yoshlar uchun ideal timsol bo‘lgan Eldor Shomurodov faoliyatida yangi bosqich boshlanishi ostonasida turibdi. Bir necha nufuzli manbalarga ko‘ra, 30 yoshli o‘zbek forvardi Italiyadagi besh yillik muvaffaqiyatli va sinovlarga boy safarini yakunlab, Turkiyaning ambitsiyali klubi “Istanbul Bashakshehir”ga o‘tishi arafasida. Shu bilan birga, Eldorga AQSH klublari, Fransiyaning “Renn” jamoasi yoki A Seriya debyutanti “Kremoneze”dan ham takliflar bo‘lgani, ammo u aynan turk klubini tanlagani aytiladi.

Ma’lumotlarga ko‘ra, “Roma” va “Bashakshehir” barcha shartlarni kelishib bo‘lgan va transfer faqat rasmiy e’lon qilinishi kutilayapti. Manbalarda qayd etilishicha, kelishuv futbolchini keyinchalik sotib olish imkoniyati bilan ijarani o‘z ichiga olgan. Ya’ni, ma’lum shartlar bajarilganda, umumiy hisobda 7 million yevroga yaqin summa to‘lanishi kutilmoqda.

Har qanday katta transferda bo‘lgani kabi, bu vaziyat ham mutaxassislar va futbol jamoatchiligi tomonidan jiddiy muhokama qilinmoqda. Rossiyalik futbol jurnalisti Aleksandr Troitskiyning fikricha, “ma’lum shartlar bajarilganda” degan ibora ortida turli xavflar yashiringan bo‘lishi mumkin. Ko‘p hollarda, bu futbolchining maydonga tushgan o‘yinlari yoki soni bilan bog‘liq bo‘ladi. Uning ta’kidlashicha, turk klubi Shomurodovni zaxiraga o‘tqazib qo‘ysa yoki muntazam o‘yin amaliyotidan mahrum qilsa, bu nafaqat futbolchi, balki O‘zbekiston terma jamoasi uchun ham katta yo‘qotishga aylanishi mumkin.

Chunki, bugungi kunda Eldor Shomurodov zimmasiga 2026 yilgi jahon chempionatida katta vazifalar yuklatilgan. U terma jamoa yetakchisi sifatida mundialda yuqori formada bo‘lishi shart va bu faqat muntazam o‘yin amaliyoti orqali ta’minlanadi. Rossiyalik ekspertning xavotiri bejiz emas: yaqinda Abduqodir Husanovning “Manchester Siti”da asosiy tarkibdan qolib ketishi ham shartnomadagi bonuslarga bog‘liq bo‘lgan.

Yakunda aytish mumkinki, Shomurodovning Turkiyaga yo‘l olishi o‘zbek futboli uchun katta imkoniyat ham, ma’lum ma’noda xavotir hamdir. Muhimi, Eldor yangi jamoasida o‘z salohiyatini to‘liq namoyon etsa, nafaqat klubi, balki milliy terma jamoa uchun ham katta yutuq bo‘ladi. Hozircha esa vaziyatni vaqt ko‘rsatadi.

Zamin.uz O‘zbekiston futbolining yetakchi yulduzi haqidagi eng so‘nggi yangiliklarni tez va aniq yoritishda davom etadi. “Zamin”ni Telegramʻda oʻqing!