"Real Madrid"ning iqtidorli va yorqin qanot hujumchisi Vinisius Junior o‘zining shaxsiy maqsadlari va futboldagi orzulari haqida samimiy fikr bildirdi. Braziliyalik futbolchi hozirgacha ko‘plab muvaffaqiyatlarga erishgan bo‘lsa-da, oldidagi yo‘l va maqsadlari hali ancha keng ekanini ta’kidladi.
"Men turli marralarga yetib keldim, ko‘plab sovrinlar va sharaflarga sazovor bo‘ldim. Lekin, shunga qaramay, meni ruhlantiradigan va ilhomlantiradigan yangi maqsadlarim bor. Men o‘z klubim bilan yanada ko‘proq yuksak mukofotlarga erishmoqchiman. Shuningdek, Braziliya terma jamoasi safida eng muhim musobaqalarda g‘alabalarga erishishni orzu qilaman", – dedi Vinisius jurnalistlarga bergan so‘hbatida.
Futbol maydonidagi yutuqlardan tashqari, vinger o‘z yurtida ta’lim sohasini yaxshilash bo‘yicha amalga oshirayotgan ijtimoiy loyihalarini ham katta maqsadlar qatorida sanadi. Uning fikricha, insonning merosi faqatgina sportdagi yutuqlar bilan emas, balki jamiyatga qilgan ijobiy hissasi bilan ham o‘lchanadi.
"Mening eng katta orzum — faqat futbolda emas, balki hayotda ham iz qoldirish. Hozirda Braziliyada o‘z jamg‘armam orqali ta’lim sohasini yaxshilashga qaratilgan ishlarni amalga oshirmoqdaman. Kelajak avlodni orzu qilishga, o‘zlariga ishonishga va yaxshi kelajak sari intilishga ilhomlantirishni istayman", – deya ta’rif berdi Vinisius Junior.
Futbolchi o‘ziga xos uslubi, mahoratli o‘yinlari va kuchli intilishi bilan nafaqat sport olamida, balki keng jamoatchilik orasida ham e’tirofga sazovor bo‘lmoqda. Uning nafaqat maydondagi harakatlari, balki hayotdagi ijtimoiy faolligi ham ko‘plab yoshlarga ibrat bo‘lmoqda.
