Angliya premer-ligasining so‘nggi yillardagi eng yorqin hujumchilaridan biri sanalgan Aleksandr Isaak atrofida kutilmagan voqealar rivojlanmoqda. “Nyukasl Yunayted”ning asosiy gol uruvchisi sifatida tanilgan shvetsiyalik futbolchi ayni damda murakkab va bahsli jarayon ichida qoldi. Jamoa bosh murabbiyi Eddi Xau ta’kidlashicha, Isaakning “Liverpul” klubi bilan faol muzokaralari sababli, u jamoaning dastlabki rasmiy uchrashuvlarini o‘tkazib yuboradi. Bu xabar klub ixlosmandlari orasida jiddiy muhokamaga sabab bo‘ldi.
— Aleksandr Isaak masalasini murabbiylar shtabi bilan batafsil ko‘rib chiqdik, – deydi Eddi Xau. – Hozirgi sharoitda uni umumiy tarkib mashg‘ulotlariga qo‘shish imkoniyati yo‘q. Bu jarayon qancha vaqt davom etishini aniq ayta olmayman. Muzokaralarimiz hozircha yopiq holatda qolishi lozim, ammo bir narsani ochiq aytaman: hozirgi paytda uni to‘liq ish jarayoniga jalb qila olmaymiz.
Murabbiyning so‘zlariga ko‘ra, u Isaakning tezroq maydonga qaytib, mashg‘ulotlarda qatnashishini chin dildan istaydi. – Agar mening ixtiyorimda bo‘lsa, Aleks bugunoq o‘yinga chiqar, ertaga esa qayta mashg‘ulotga qo‘shilar edi. U jamoamizning muhim figuralaridan biri va uning safimizda bo‘lishi biz uchun katta quvonch, – dedi Xau.
Shu bilan birga, tajribali mutaxassis vaziyatning “Aston Villa”ga qarshi birinchi rasmiy o‘yinga qadar ijobiy hal etilishiga umid qilishini bildirgan, ammo hozircha vaziyat o‘zgarishiga ishonchi baland emas. – Hozir biz jamoaning eng asosiy bo‘lagini vaqtincha yo‘qotyapmiz, bu esa tabiiy ravishda mening jahlimni chiqaryapti, – deya qo‘shimcha qildi u.
Eslatib o‘tamiz, bundan avvalroq matbuotda Aleksandr Isaakning “Liverpul”ga ko‘chib o‘tishi uchun harakat qilayotgani haqida ma’lumotlar tarqalgandi. Biroq “Nyukasl” rahbariyati uni qo‘yib yubormaslikka qaror qilgan va ingliz chempionlari tomonidan taklif etilgan 111 million funtlik mablag‘ni rad etgan. Bu esa transfer atrofidagi qiziqishni yanada oshirdi.
Yangi mavsum ostonasidagi bu kelishmovchilik va noaniqlik “Nyukasl” uchun jiddiy sinovga aylanishi mumkin. Muxlislar esa Isaakning taqdiri qachon va qanday hal etilishini qiziqish bilan kutmoqda.
