Angliyaning yetakchi klublaridan biri bo‘lgan “Manchester Siti” yaqin vaqt ichida sensatsiyali transfer amalga oshirishi mumkin. Gap, Madridning “Real” jamoasi qanot hujumchisi Rodrigo haqida ketmoqda.
Futbol insayderi Fabritsio Romanoning ishonchli ma’lumot berishicha, bir qator futbolchilar bilan xayrlashish arafasida turgan “shaharliklar” jamoani yangi yulduz bilan kuchaytirish imkoniyatini jiddiy ko‘rib chiqmoqda. Manbalarga ko‘ra, Jek Grilish “Everton” safiga ijara asosida yo‘l olishi kutilayotgan bo‘lsa, yosh iqtidor Jeyms Makati “Nottingem Forest” bilan kelishuvga yaqinlashgan. Shu bilan birga, yana bir yosh iqtidorli vinger Savino Moreyruni “Tottenhem” sotib olishi mumkin.
Aynan shunday o‘zgarishlar fonida “Siti” bosh murabbiyi Xosep Gvardiola Rodrigoni jamoaga jalb qilish g‘oyasini qo‘llab-quvvatlayapti. Ma’lumotlarga ko‘ra, ispan mutaxassisi braziliyalik futbolchining o‘yin uslubiga, texnik mahoratiga va tezkor hujumlardagi samaradorligiga yuqori baho beradi.
“Real” esa futbolchi jamoani tark etish xohishini bildirsa, unga yo‘l berishga tayyor ekani qayd etilmoqda. Biroq madridliklar Rodrigo uchun taxminan 100 million yevro miqdorida to‘lov talab qilishi kutilyapti. Bu esa transferni moliyaviy jihatdan eng yirik kelishuvlardan biriga aylantirishi mumkin.
Eslatib o‘tamiz, Rodrigo La Liganing o‘tgan mavsumida 30 ta uchrashuvda maydonga tushib, 6 ta gol va 5 ta golli uzatma bilan jamoasiga hissa qo‘shgan. Uning tezkor harakatlari, driblingdagi mahoratlari va hal qiluvchi epizodlardagi faolligi muxlislar qalbini zabt etgan.
Agar ushbu transfer amalga oshsa, “Manchester Siti” hujum chizig‘ida yanada ko‘proq chuqurlik va raqobat paydo bo‘lishi shubhasiz. Muxlislar esa yaqin kunlarda bu haqdagi rasmiy xabarni intizorlik bilan kutib qolishmoqda.
