Futbol olamining eng nufuzli shaxslaridan biri bo‘lgan Zinedin Zidan 2021 yilda “Real Madrid” bosh murabbiyligi lavozimidan ketganidan beri faoliyatdan bir muddat uzoqlashgan edi. Biroq endi u yana o‘zining sevimli ishiga qaytish imkoniyati ostonasida turibdi. Muqaddas to‘p atrofidagi insayderlar va nufuzli nashrlar fransiyalik afsona uchun yangi yo‘nalish aniqlanayotganini xabar qilmoqda.
Ishonchli manbalardan biri sanalgan Defensa Central'ning yozishicha, Zidan 2026 yilgi jahon chempionati yakunlanganidan so‘ng Fransiya milliy terma jamoasi boshqaruvini qabul qilishi kutilmoqda. Bu degani, u jamoani uzoq yillar davomida muvaffaqiyatli boshqarib kelayotgan Dide Desham o‘rnini egallashi mumkin.
Ushbu xabarni yanada mustahkamlagan ma’lumotni RMC Sport jurnalisti Jilber Brisbua ham tasdiqladi. Uning aytishicha, Zidan haqiqatan ham Fransiya termasiga rahbarlik qilishga asosiy nomzod sifatida ko‘rilayapti.
Zidanning o‘zi ham yaqinda bergan intervyusida, shu kungacha o‘zini to‘liq futbol murabbiyi sifatida his qilayotganini va munosib takliflar bo‘lsa, yana ish boshlashga tayyorligini ta’kidladi. Bu so‘zlar, albatta, fransuz futbol muxlislari orasida katta qiziqish uyg‘otdi.
Dide Desham esa, bu xabarga mutlaq xotirjam munosabat bildirdi. Uning so‘zlariga ko‘ra, Zidan bosh murabbiy sifatida juda munosib tanlov hisoblanadi:
— “Zizu – bu tabiiy va hamma kutgan variant. Uning tajribasi va obro‘si Fransiya termasi uchun katta plyus bo‘ladi”, — dedi Desham.
Ma’lumki, Fransiya terma jamoasini boshqarish Zinedin Zidanning eng katta orzusi hisoblanadi. Shu sababli u har yili turli yirik klublardan oladigan takliflarni rad etib kelmoqda. Uning ko‘zlagan asosiy maqsadi — milliy jamoani yuqori cho‘qqilarga olib chiqish va yana bir bor fransuz futboli tarixida yorqin sahifa ochish.
Agar ushbu reja amalga oshsa, Fransiya termasi yangi davrga qadam qo‘yishi va Zidan rahbarligida yanada yuqori maqsadlar sari intilishi ehtimoldan xoli emas.
