O‘zbekiston milliy terma jamoasining asosiy tayanch ustunlari hisoblangan Eldor Shomurodov hamda yosh, iqtidorli hujumkor Abbosbek Fayzullayev yangi mavsumdan Turkiyaning nufuzli klubi — “Istanbul Bashakshehir” sharafini himoya qiladigan futbolchilar safiga qo‘shildi. Bu ikki nom mamlakatimiz futboli muxlislari uchun alohida iftixor tuyg‘usini ulug‘laydi.
Turkiya Superligasi rasmiy tarzda start olganiga qaramay, “Bashakshehir” Yevrokuboklarda faol ishtirok etayotgani sababli milliy chempionatdagi ilk uchrashuvini keyinroq o‘tkazadi. Biroq bu holat ularning mavsumga tayyorgarligini ortga surmadi — jamoa UYEFA Konferensiyalar ligasi saralash bosqichida allaqachon uchta muhim bahsni o‘tkazib ulgurdi. Bolgariyaning “Cherno More” va Norvegiyaning “Viking” jamoalariga qarshi kechgan har ikki bahsda ham, shuningdek, keyingi uchrashuvda ham, “Roma” klubidan ijara asosida jalb etilgan Eldor Shomurodov maydonga tushdi.
Taqdirning o‘ziga xos ironiyasi shundaki, “Roma” safida Konferensiyalar ligasi kubogini ko‘targan Shomurodovning “Bashakshehir”dagi ilk chiqishi ham aynan shu musobaqada sodir bo‘ldi. Bu esa uning Yevropa sahnasidagi tajribasi yanada boyib, yangi jamoasi uchun muhim qo‘shimcha kuch bo‘lishini anglatadi.
Endilikda esa “Bashakshehir” va Abbosbek Fayzullayevning shaxsiy muxlislari katta intiqlik bilan 21 yoshli yosh yulduzning debyutini kutmoqda. Har qancha mashg‘ulotlarda mahoratini namoyon etayotgan bo‘lsa-da, Abbos hanuz rasmiy o‘yinda maydonga tushirilmadi.
Jamoa bosh murabbiyi Chag‘dash Atan bu masalaga alohida izoh berdi:
— “SSKAdan olib kelingan yangi iqtidorli futbolchi Abbosbek Fayzullayev o‘tgan haftadagi mashg‘ulotlarda o‘zining yuqori salohiyati va maydondagi faol harakatlari bilan jamoamizda alohida taassurot qoldirdi. Biroq uning transferiga oid hujjatlar jarayoni hali to‘liq yakunlanmadi. Shu sababli, ehtimol, u “Viking”ga qarshi bahslarda qatnasholmasa kerak. Agar barcha rasmiy ishlar ijobiy hal etilsa, javob uchrashuvida undan foydalanish imkoni paydo bo‘ladi”.
Abbosbekning transferi Rossiya ommaviy axborot vositalari diqqat markazida ham bo‘lib turibdi. SSKA klubi kommunikatsiyalar bo‘yicha direktori Kirill Breydo vaziyatga oydinlik kiritib:
— “SSKA hali “Bashakshehir”dan Abbosbek Fayzullayev transferi uchun belgilangan mablag‘ni qabul qilgani yo‘q. Turk klubi bilan doimiy aloqada bo‘lib, masalani hal etishga harakat qilyapmiz. Shu haftada pul tushishini kutyapmiz”, — deya ma’lum qildi.
Ma’lumotlarga ko‘ra, transfer qiymati 7,5 million yevroga baholangan va kelishuvga ko‘ra, “Bashakshehir” bu summani bir yo‘la to‘lashi shart. Shuningdek, Fayzullayevning o‘yinlardagi ko‘rsatkichlariga qarab, yana 2,5 million yevro miqdorida bonus ajratilishi mumkin.
Shubhasiz, ushbu ikki yulduzning bir jamoada birlashishi nafaqat “Bashakshehir” uchun, balki O‘zbekiston futboli uchun ham katta imkoniyatlar eshigini ochadi. Ulardan har biri o‘z navbatida yangi sahnadagi o‘yinlari bilan nafaqat mahalliy, balki xalqaro maydonda ham muxlislar qalbini zabt etishga harakat qiladi.
