Fransiya chempionati klublari katta liganing boshqa mamlakatlari yoki moliyaviy imkoniyatlari keng bo‘lgan davlatlar chempionatlariga ko‘plab mahoratli futbolchilarni yetkazib berishi bilan ham tanilgan. Bundan tashqari, ko‘plab jamoalar o‘z moliyaviy imkoniyatlarini aynan iste’dodli ijrochilarni sotish hisobidan to‘ldirib boradi.
Shu jihatdan, O‘zbekiston milliy terma jamoasi markaziy himoyachisi Abduqodir Husonov faoliyat olib borgan «Lans» klubi ham so‘nggi yillarda transfer bozorida katta daromad topayotgan jamoalardan biri sifatida tilga olinmoqda.
Bu yildagi eng yirik chiqish transferi sifatida Endi Diufning «Inter»ga o‘tishi qayd etildi. Italiya grandi 22 yoshli markaziy yarim himoyachi uchun 20 million yevro to‘lab, yana 5 million yevro bonus sifatida qo‘shib berishga kelishdi.
Aslida, «Lans» klubi bundan avval ham yirik rekordlarga erishgandi. 2023 yilning 14 iyunida klubning asosiy hujumchisi Loi Openda 40 million yevro evaziga «Leyptsig» jamoasiga yo‘l oldi. Unga bir yil avval «Bryugge»dan 15,39 million yevroga olib kelingan Openda shunday qilib klub tarixidagi eng qimmat sotuv sifatida qayd etilgan edi.
Shuningdek, oradan bir yarim yil o‘tib, yana bir 40 million yevrolik transfer amalga oshdi. Bu safar «Manchester Siti» o‘zbekistonlik legioner Abduqodir Husonov uchun shu miqdorda mablag‘ni «Lans» klubi hisob raqamiga o‘tkazdi.
Qizig‘i shundaki, Husonov uchun «Lans» bor-yo‘g‘i yuz ming yevro sarflab, uni «Energetik-BGU»dan olib kelgandi. Atigi bir yarim yil ichida bu investitsiya klub uchun to‘rt yuz baravar foyda keltirdi va himoyachi klub tarixidagi eng katta daromad keltirgan futbolchiga aylandi.
Shu tariqa, Loi Openda va Abduqodir Husonov «Lans» tarixidagi eng qimmat sotilgan o‘yinchilar sifatida teng ko‘rsatkich bilan peshqadamlikni saqlab turibdi.
Nufuzli transfermarkt.world portali keltirgan ma’lumotlarga ko‘ra, ulardan keyingi eng yirik chiqish transferlari quyidagicha tartibda joy olgan:
-
Ele Vahi – «Marsel», 27 million yevro
-
Seko Fofana – «An-Nasr», 25 million yevro
-
Kevin Danso – «Tottenhem», 25 million yevro
-
Nil El-Aynaui – «Roma», 23,5 million yevro
-
Sheyk Dukur – «Kristal Pelas», 22,6 million yevro
-
Endi Diuf – «Inter», 20 million yevro
-
Loik Bade – «Renn», 17 million yevro
-
El-Haji Diuf – «Liverpul», 15 million yevro
Shuningdek, Husonovning «Lans» tarixidagi eng daromadli o‘yinchi sifatida qayd etilishi o‘zbekistonlik futbolchilarning Evropadagi nufuzini yanada oshirdi.
“Zamin”ni Telegramʻda oʻqing!
