“Real” uchun “Qayrat” safaridan oldin noqulayliklar muhokama qilindi

“Real Madrid TV” dasturi orqali klubning Chempionlar ligasida Qozog‘istonning “Qayrat” jamoasiga qarshi kechadigan bahs haqida so‘z yuritildi. Efir davomida ayniqsa uzoq masofaga safar qilish masalasi katta muhokamaga sabab bo‘ldi.

Boshlovchilardan biri shunday izoh berdi:

— Kim o‘ylabdi deysiz, biz eng uzoq safarga yo‘l olyapmiz — qariyb 6500 kilometr, bu deyarli Xitoygacha bo‘lgan masofa. Bu, albatta, jamoaga jismoniy jihatdan ham, psixologik jihatdan ham qiyinchilik keltirishi mumkin.

Yana bir boshlovchi esa o‘z fikrini qo‘shimcha qildi:

— Xo‘sh, “Real”ga yana o‘tgan mavsumdagidek qur’ada eng noqulay raqiblar to‘g‘ri keldi. Qizig‘i shundaki, ikkala holatda ham qur’a kompyuter orqali o‘tkazildi. Bu qanchalik tasodif ekanligi ko‘pchilikni o‘ylantirishi tabiiy. Axir, gap nafaqat kuchli raqiblar haqida, balki hatto nisbatan kichik klublarga qarshi ham biz uchun eng og‘ir yo‘l tushdi — Xitoy chegarasigacha deyarli 300 kilometr qolgan hududga borishga to‘g‘ri keladi.

Mutaxassislar ta’kidlashicha, bunday safarlar jamoa tayyorgarligi va tiklanish jarayoniga ta’sir ko‘rsatishi mumkin. Ammo shunga qaramay, “Real” katta maqsadlar yo‘lida bu to‘siqlarni ham yengib o‘tishi kutilmoqda.

Muxlislar esa “qirollik klubi”ning Olmaota safarida qanday natija qayd etishini katta qiziqish va intiqlik bilan kutmoqda.