FIFA rahbari Janni Infantino yaqin kunlarda yurtimizga tashrif buyurishi rejalashtirilmoqda. Bu haqda O‘zbekiston futbol assotsiatsiyasi axborot xizmati orqali ma’lum qilindi.
Ma’lumotlarga ko‘ra, FIFA Prezidentining safaridan asosiy maqsad — O‘zbekistonda futbolni yanada yuksaltirish va yangi loyihalarni amalga oshirish masalalari yuzasidan atroflicha fikr almashish hisoblanadi. Shu bilan birga, u «Milliy futbol markazi» faoliyati bilan yaqindan tanishib chiqishi ham kutilmoqda.
Eng muhim jihatlardan biri shundaki, Infantino «CAFA Nations Cup 2025» musobaqasining hal qiluvchi bahsini stadiondan shaxsan tomosha qiladi. Bu uchrashuv futbol muxlislari uchun nafaqat yilning, balki mintaqaning eng yirik voqealaridan biriga aylanishi shubhasiz.
Eslatib o‘tamiz, musobaqaning final bosqichida O‘zbekiston milliy jamoasi Eron termasiga qarshi bahs olib boradi. Qattiq kurash va yuksak muhitda o‘tishi kutilgan ushbu uchrashuv 8-sentyabr kuni «Olimpiya» stadionida o‘tkaziladi.
O‘z navbatida, futbol muxlislari ushbu safar nafaqat milliy jamoamizning g‘alabasiga ishonmoqda, balki Infantino tashrifi orqali mamlakatimizda futbol sohasida yangi imkoniyatlar eshigi ochilishini ham kutib qolmoqda.
“Zamin”ni Telegramʻda oʻqing!
