Bugun Qashqadaryo viloyati rahbariyati, viloyat hokimi Murotjon Azimov boshchiligida, Chempionlar Ligasi Elit bosqichi start oldidan “Nasaf” jamoasi bilan uchrashuv o‘tkazdi. Suhbat jarayonida hokim “Nasaf” nafaqat viloyat, balki butun mamlakat sharafini himoya qilayotgan bayroqdor klub ekanini ta’kidladi.
Uning so‘zlariga ko‘ra, jamoa shu mavsum Superligadagi chempionlikni saqlab qolish bilan birga, xalqaro maydonda ham munosib qatnashishi shart. Bu orqali jamoa o‘z nomi va mamlakat sharafini yuksak marralarga olib chiqishi mumkin.
Bosh murabbiy Ro‘ziqul Berdiyev esa yaratilgan shart-sharoitlar uchun samimiy minnatdorlik bildirdi. U jamoa oldida qo‘yilgan vazifalarni yuqori darajada bajarishga harakat qilishlarini qayd etdi. Klub prezidenti Shuhrat Aslanov ham jamoa zimmasida katta mas’uliyat borligini, lekin undan qochmay, olg‘a dadil qadam tashlash muhimligini uqtirdi.
So‘nggi yillarda “Nasaf” safidan milliy va yoshlar terma jamoalari uchun munosib futbolchilar yetishib chiqayotgani alohida e’tirof etildi. Shu bois bu yo‘nalishda ishlarni yanada rivojlantirish zarurligi ta’kidlandi.
Jamoa sardori Umarbek Eshmurodov va darvozabon Abduvohid Ne’matov viloyat rahbariyati hamda homiylarga jamoa nomidan samimiy minnatdorchilik bildirdi.
Uchrashuv davomida yana bir muhim voqea sodir bo‘ldi — “Nasaf” futbol maktabi qoshida yangi sun’iy qoplamali maydonlar tantanali ravishda ochildi. Marosimda asosiy jamoa a’zolari va futbol maktabining yosh tarbiyalanuvchilari ishtirok etdi.
Qashqadaryo viloyati hokimi, shuningdek, viloyat futbol assotsiatsiyasi prezidenti sifatida ham yosh futbolchilarga omad tilab, ularni “Nasaf” a’zolaridek muvaffaqiyatli bo‘lishga chorladi.
Shu tariqa, “Nasaf” uchun katta sinovlar boshlanishidan oldin viloyat rahbariyatining qo‘llab-quvvatlovi jamoa uchun yangi ruh va kuch bag‘ishladi.
“Zamin”ni Telegramʻda oʻqing!
