O‘zbekiston futbol assotsiatsiyasi terma jamoalar bo‘limi rahbari sifatida ishlab kelgan Sherzod Igamberdiyev endi bu vazifada faoliyat yuritmaydi. Bu haqda sobiq mas’ul shaxsning o‘zi ijtimoiy tarmoqdagi shaxsiy sahifasida ma’lumot berdi.
Ma’lumki, Igamberdiyev 2024-yil noyabridan boshlab O‘FA terma jamoalar bo‘limi boshlig‘i sifatida ish olib borgan edi. Uning boshqaruvi davrida milliy jamoalar bilan bog‘liq bir qator ishlar amalga oshirildi.
Shu bilan birga, u assotsiatsiyaning xalqaro aloqalar bo‘limi rahbari sifatida ham xizmat qilib kelgan. Ushbu jarayonda xalqaro maydonda ko‘plab muzokara va hamkorlik aloqalarini yo‘lga qo‘ygani qayd etiladi.
Sherzod Igamberdiyev o‘z bayonotida jamoa va hamkasblariga minnatdorchilik bildirib, kelgusida yangi yo‘nalishlarda faoliyat yuritishini aytib o‘tdi.
Bu o‘zgarishdan so‘ng, O‘FA terma jamoalar bo‘limida boshqaruv uchun yangi nomzod tayinlanishi kutilmoqda. Muxlislar esa bu qarordan keyin milliy jamoalar tizimida qanday yangiliklar bo‘lishini qiziqish bilan kutmoqda.
“Zamin”ni Telegramʻda oʻqing!
