«Liverpul»ning bosh murabbiyi Arne Slot jamoaga yaqinda qo‘shilgan shved hujumchisi Aleksandr Isak haqida to‘xtalib o‘tdi. Uning debyuti Yevropa Chempionlar ligasi umumiy bosqichi birinchi turida Madridning «Atletiko» klubiga qarshi bahsda ro‘y berdi.
Murabbiyning ta’kidlashicha, Isak maydonda deyarli 60 daqiqa harakat qilgani va bu uning jismoniy holati ancha yaxshi ekanini ko‘rsatgan. «Uning 10 daqiqadan keyin charchashi yoki kuchdan qolishi sezilmadi. Bir-ikki hafta jamoa bilan to‘liq mashg‘ulotlar o‘tkazganidan keyin yanada samarali o‘ynashini kutish mumkin», – dedi Slot.
Shuningdek, gollandiyalik mutaxassis Isakning o‘yini o‘zi kutganidan ham yaxshiroq chiqqanini ta’kidladi. Biroq Slotning so‘zlariga ko‘ra, muxlislar hali undan haddan tashqari katta natijalar talab qilmasligi lozim. «Bizda haftasiga uchtadan o‘yin bo‘ladi, bu esa uning tanasi uchun katta yuk. Shu sababli bizdagi ikki ishonchli markaziy hujumchidan navbatma-navbat foydalanib boramiz», – deya qo‘shimcha qildi murabbiy.
Ma’lumot uchun, 25 yoshli Aleksandr Isak yozda «Nyukasl»dan «Liverpul»ga 125 million funt evaziga ko‘chib o‘tdi. U o‘tgan mavsum barcha musobaqalarda 42 ta o‘yinda maydonga tushib, 27 ta gol urgan hamda 6 ta assist qayd etgan edi.
Yangi transferning ilk qadamlari «Liverpul» safida muxlislarni qiziqtirishi tabiiy. Arne Slot esa uning imkoniyatlaridan to‘liq foydalanish uchun vaqt kerakligini alohida urg‘uladi.
“Zamin”ni Telegramʻda oʻqing!
