Himoya chizig‘idagi yosh iste’dod Niko O’Rayli “Manchester Siti” bilan uzoq vaqt davomida qolishi aniq bo‘ldi. Klub rahbariyati va futbolchi o‘rtasida rasman 2030-yil yozigacha amal qiladigan yangi shartnoma imzolandi. Bu kelishuv jamoaning yosh avlodga bo‘lgan ishonchi va kelajakka qaratilgan uzoqni ko‘zlagan rejalaridan darak bermoqda.
20 yoshli O’Rayli joriy mavsumda “shaharliklar” safida 4 ta rasmiy bahsda ishtirok etdi. Undan avvalgi mavsumda esa jamoa libosida 9 marta maydonga tushib, 2 ta muhim gol muallifiga aylangandi. Bu ko‘rsatkichlar uning himoyachi bo‘lishiga qaramay hujumga qo‘shilib ketish qobiliyati yuqori ekanini ko‘rsatadi.
“Siti”ning uzoq muddatli rejalarida Niko kabi futbolchilarga katta e’tibor qaratilmoqda. Xususan, Xosep Gvardiola yosh himoyachiga ishonch bildirib, uning salohiyati jamoa uchun kelgusi yillarda muhim omil bo‘lishi mumkinligini ta’kidlab kelmoqda.
Muxlislar ham bu yangilikni ijobiy kutib olib, ijtimoiy tarmoqlarda O’Raylining kelajakda jamoa yetakchilaridan biriga aylanishi mumkinligini qayd etishmoqda.
“Zamin”ni Telegramʻda oʻqing!
