Mbappe: «Uchta gol yaxshi, lekin yana ko‘prog‘ini istayman»

Yevropa Chempionlar Ligasi 2-turidan o‘rin olgan «Qayrat» – «Real» bahsida madridliklar yorqin va ishonchli o‘yin namoyish etishdi. Fransiyalik yulduz Kilian Mbappe uchrashuvning eng asosiy qahramoniga aylanib, xet-trik qayd etdi. Undan tashqari, Kamavinga va Braim Dias ham o‘z hisobiga gol yozdirib qo‘yishdi. Ushbu g‘alabadan keyin Mbappe matbuotga fikr bildirib, bir qator savollarga javob qaytardi.

Fransiyalik forvardga yaqinda Pireney derbisida «Atletiko Madrid»ga qarshi 2:5 hisobidagi mag‘lubiyat haqida savol berildi. U bugungi g‘alabaga qaramay, o‘sha natijani hali ham esidan chiqarmasligini ta’kidladi:

«Yo‘q, yo‘q, yo‘q. Unutmaslik kerak. Bu — boshqa turnir, lekin o‘tgan haftadagi mag‘lubiyat haqida o‘ylashimiz va bu yana takrorlanmasligi uchun ishlashimiz zarur».

Mbappe «Real» gollarining yarmi unga tegishli ekani haqidagi savolga shunday javob berdi:

«Mening asosiy vazifam – jamoaga yordam berish. Men faqat g‘alabalar va sovrinlar haqida o‘ylayman. Gollar – buning bir qismi, ammo asosiy maqsad – jamoa muvaffaqiyati».

Fransiyalik yulduz jamoadoshi Arda Gyuler haqida ham to‘xtalib o‘tdi:

«U juda iste’dodli va kuchli futbolchi. Biz unga o‘zining eng yaxshi o‘yinini ko‘rsatishi uchun yordam beryapmiz. Uning jamoamizda ekanidan juda xursandmiz».

Hujumchiga «qancha imkoniyatni qo‘ldan chiqardingiz?» degan savol berilganda, u kutilganidek javob berdi:

«Men kabi hujumchiga beshta imkoniyat berilsa, ularning barchasini golga aylantirishi kerak. Shuning uchun ham «Real» men bilan shartnoma imzoladi. Uchta gol – yaxshi, lekin har doim ko‘prog‘ini istayman».

So‘nggi gollardan biri darvozabon Tibo Kurtua uzatmasidan keyin kiritilgani eslatildi. Mbappe bu holat haqida shunday dedi:

«U maxsus shunday uzatdimi, bilmayman, lekin bu ajoyib pas bo‘ldi. Golning 80 foizini u qildi, men faqat 20 foizini».

Shu tariqa, «Qayrat» ustidan yirik g‘alaba «Real»ga guruhda peshqadamlikni taqdim etdi. Mbappe esa yana bir bor jamoasi uchun naqadar muhim shaxs ekanini isbotladi. Uning istaklari esa oddiy: uchta gol bilan to‘xtab qolmasdan, yanada ko‘prog‘ini kiritish va «Real»ga katta sovrinlar olib kelish.