“Manchester Siti” klubining asosiy hujumchisi va to‘purari Erling Xoland Angliya Premer-ligasida jahon darajasidagi mahoratini namoyish etishdan oldin Avstriya hamda Germaniya chempionatlarida o‘z iste’dodini ko‘rsatgan.
25 yoshli norvegiyalik yulduz hozirda “shaharliklar” bilan 2034-yilning o‘rtalarigacha mo‘ljallangan shartnomaga ega. Biroq Yevropaning yetakchi OAVlari yozganidek, uning keyingi manzili Ispaniya bo‘lishi ehtimoli tobora kuchaymoqda.
So‘nggi ma’lumotlarga ko‘ra, “Barselona” rahbariyati o‘zining azaliy raqibi — “Real Madrid” bilan teng darajada kurashish uchun jamoaga aynan Erling Xolandni olib kelish rejasini ishlab chiqmoqda. Kataloniya klubi bu transferni jamoaning yangi “quyosh”i sifatida ko‘rmoqda.
Biroq bu safar “Real” ham bekor turibdi, deyish qiyin. Transfer News Live, El Larguero va Cadena SER manbalarining yozishicha, madridliklar ham hujum chizig‘ini kuchaytirish uchun Xolandni olish niyatida.
Ma’lumotlarga qaraganda, klub prezidenti Florentino Peres bir necha yillardan beri Mbappe va Xolanddan iborat “superjuftlik”ni yaratish g‘oyasini ko‘nglida saqlab kelmoqda. Endi esa u bu rejani amalga oshirish uchun qayta faol harakat boshlagan.
Ayniqsa, Vinisius Juniorning kelajagi bor-yog‘i bir necha hafta ichida savol ostida qolgan bir paytda, bu reja yanada dolzarb tus oldi. Manbalarning ta’kidlashicha, klub rahbariyati braziliyalik vingerni ehtimoliy sotuv haqida ogohlantirgan va bu yo‘l bilan Erling Xolandni olib kelish imkonini yaratishni ko‘zlamoqda.
“Transfermarkt” ekspertlarining baholashicha, norvegiyalik hujumchi hozirgi kunda 180 million yevro atrofida baholanmoqda. Agar “Real” Vinisiusni sotishga qaror qilsa, bu mablag‘ni to‘lash madridliklar uchun jiddiy muammo tug‘dirmaydi.
Erling Xolandning transferi futbol olamida katta shov-shuv keltirishi kutilmoqda. Uning Ispaniya chempionatiga yo‘l olishi nafaqat “Real” va “Barselona” o‘rtasidagi raqobatni yanada qizitadi, balki butun Yevropa futbolida yangi davrni boshlab berishi mumkin.
Hozircha “Manchester Siti” vakillari bu borada rasmiy izoh bermagan. Biroq futbol ekspertlariga ko‘ra, agar bu transfer amalga oshsa, Erling Xolandning Madriddagi debyuti yilning eng yodda qolarli voqeasi bo‘ladi.
“Zamin”ni Telegramʻda oʻqing!
