Afrika qit’asidagi jahon chempionati–2026 saralash bosqichi yakunlandi va yana bir ishtirokchi nomi ma’lum bo‘ldi. Gana milliy terma jamoasi so‘nggi turda muhim g‘alaba qozonib, mundialga chiqish imkonini qo‘lga kiritdi.
Bellashuvda Gana Quddus kiritgan gol orqali Qamar orollari ustidan minimal hisobda g‘alaba qozondi. Bu natija ularga Madagaskar va Malidan yuqori pog‘onada turish hamda guruhda birinchi o‘rinni egallash imkonini berdi.
Shu tariqa, Gana o‘z tarixida beshinchi marta jahon chempionatida ishtirok etadigan bo‘ldi. Afrikaliklar birinchi bor 2006 yilda mundialda debyut qilgan va shundan beri faqat 2018 yilgi musobaqani o‘tkazib yuborgan.
Gananing tarixdagi eng yorqin natijasi — 2010 yilda JARda o‘tgan mundialda qayd etilgan. O‘shanda jamoa chorak finalgacha yetib borgan va dunyo futbolida katta taassurot qoldirgan edi.
Ma’lumot uchun, hozircha JCh–2026 musobaqasiga yo‘llanma olgan 21 jamoa quyidagicha:
AQSh, Kanada, Meksika, Yaponiya, Yangi Zelandiya, Eron, Argentina, O‘zbekiston, Janubiy Koreya, Iordaniya, Avstraliya, Braziliya, Ekvador, Urugvay, Kolumbiya, Paragvay, Marokash, Tunis, Misr, Jazoir va endi Gana.
Tahlilchilar fikricha, Gananing qaytishi Afrika uchun katta g‘alaba bo‘ldi — jamoa yana bir bor qit’aning nomini jahon sahnasida sharaf bilan himoya qilish imkoniga ega bo‘ldi.
“Zamin”ni Telegramʻda oʻqing!
