AQSh prezidenti Donald Tramp Jahon chempionati–2026 bilan bog‘liq masalada yana bir bor rezonans keltirdi. U Boston shahri musobaqa mezbonligi huquqidan mahrum qilinishi mumkinligini ma’lum qildi.
Seshanba kuni u Argentina prezidenti Xavyer Mileyning bilan uchrashuvdan so‘ng jurnalistlar savollariga javob berdi. Suhbat davomida Trampdan Boston meri Mishel Vuning munosabati va o‘yinlarni boshqa shaharga ko‘chirish ehtimoli haqida so‘rashdi.
— Biz o‘yinlarni boshqa joyga ko‘chirishimiz mumkin. Men Boston aholisini yaxshi ko‘raman, ular ajoyib insonlar. Ammo mer — unchalik yaxshi emas. U aqlli, lekin juda radikal so‘l g‘oyalarga ega. Agar men u yerda xavfsizlik bo‘yicha jiddiy muammo bor deb hisoblansam, FIFA prezidenti Janni Infantinoga qo‘ng‘iroq qilaman va shunday deyman: “Janni, bu o‘yinlarni boshqa joyga ko‘chirsak qanday?” U avval boshda rozi bo‘lmasligi mumkin, lekin buni amalga oshirish juda oson, — dedi Tramp.
Uning bu bayonoti AQShda katta muhokamaga sabab bo‘ldi. Boston — Jahon chempionati–2026 uchun tanlangan 11 ta AQSh shaharlaridan biri bo‘lib, u yerda bir necha muhim bellashuvlar o‘tkazilishi rejalashtirilgan.
Trampning so‘zlariga ko‘ra, u nafaqat xavfsizlikni, balki tashkilotchilik darajasini ham muhim deb hisoblaydi. Prezident fikricha, agar shahar ma’muriyati xalqaro tadbirni yuqori darajada o‘tkazishga tayyor bo‘lmasa, o‘yinlarni boshqa shaharga ko‘chirish mutlaqo mantiqli qaror bo‘ladi.
Mishel Vu esa o‘z navbatida, Trampning so‘zlarini siyosiy xarakterga ega degan fikrda. Uning ta’kidlashicha, Boston barcha talab va mezonlarga to‘liq javob beradi va Jahon chempionati mezbonligi uchun faxrlanadi.
FIFA tomonidan hozircha rasmiy izoh berilmagan. Ammo tashkilot ichki manbalari Trampning so‘zlari shunchaki siyosiy bayonot ekanini ta’kidlamoqda.
Ma’lumot uchun, Jahon chempionati–2026 ilk bor tarixda uch mamlakat — AQSh, Kanada va Meksikada bir vaqtning o‘zida o‘tkaziladi. Musobaqa 11 iyundan 19 iyulgacha bo‘lib o‘tadi va unda 48 ta terma jamoa ishtirok etadi.
AQShda musobaqa finali Nyu-York yaqinidagi “MetLife Stadium”da o‘tkazilishi kutilmoqda. Ammo Trampning Boston haqidagi bayonoti jahon futboli atrofidagi siyosiy shov-shuvni yanada kuchaytirdi.
Shunday qilib, Trampning bu chiqishi nafaqat sport olamida, balki siyosiy maydonda ham katta bahslarga sabab bo‘ldi. Jahon chempionati–2026 arafasida u yana bir bor diqqat markaziga chiqdi — bu gal futbolga aralashgan holda.
“Zamin”ni Telegramʻda oʻqing!
