“Real”ning yosh yulduzi Arda Güler joriy mavsumdagi holati, jamoada tutgan oʻrni va yetakchi Kylian Mbappe bilan oʻzaro tushunuv haqida fikr bildirdi. Shuningdek, u sobiq murabbiy Carlo Ancelotti va jamoaning hozirgi bosh ustoz Xabi Alonso haqida ham gapirdi.
Turkiyalik 20 yoshli yarimhimoyachi bu mavsum La Ligada 8 ta oʻyinda 3 ta gol va 3 ta golli pas bilan jamoa hujumining muhim figuralaridan biriga aylandi. Uning Mbappe bilan uygʻun harakatlari mutaxassislar tomonidan alohida eʼtirof etilmoqda.
— Mbappe? U baʼzan yarimhimoyaga ham tushadi, lekin bu uning oʻyinni his qilish darajasining yuqoriligidan dalolat. Uning iqtidoriga chek qoʻyish kerak emas. Biz oʻzaro maydonda juda yaxshi tushunamiz, baʼzan bir qarashning oʻzi yetarli, — dedi Güler fransuz OAVga bergan suhbatida.
Arda Güler, shuningdek, ularning oʻyin uslubi Cristiano Ronaldo va Mesut Özil tandemini eslatayotganini eshitib mamnunligini bildirdi, ammo katta natijaga faqat ikki emas, balki butun jamoa orqali erishish mumkinligini taʼkidladi.
— Ancelotti — tarixdagi eng buyuk murabbiylardan biri. U men haqimda juda iliq fikr bildirgan edi va bu menga katta kuch berdi, — dedi u.
Yosh futbolchi jamoaga kelganida skaut Juni Calafat unga Yevropadagi hayotning ilk yili oson kechmasligini oldindan aytganini ham esladi:
— Juni menga birinchi yil ogʻir boʻlishini tushuntirdi. Bu tabiiy holat — Turkiyadan kelgan yosh oʻyinchi uchun Yevropaning eng yirik klubiga moslashish vaqt talab qiladi, — deya qoʻshimcha qildi Güler.
Hozirda u bosh murabbiy Xabi Alonso rahbarligida oʻzini ancha erkin his qilayotganini taʼkidladi. Uning fikricha, yangi tizim unga ijodkorlik va maydondagi qaror qabul qilishda katta imkoniyat yaratmoqda.
— Biz bir marta Chempionlar ligasini yutdik, lekin bu men uchun yetarli emas. Men yana titul, yana gʻalabalar uchun kurashmoqchiman. Bu mening “Real”dagi maqsadim, — deya soʻzini yakunladi Arda Güler.
Shunday qilib, turkiyalik yosh yulduz nafaqat texnik mahorat, balki tafakkur va ambitsiyasi bilan ham jamoada oʻz oʻrnini topayotganini koʻrsatmoqda. “Real”dagi yangi avlod ichida Gülerning ismi tobora baland yangramoqda — u faqat oʻyinchi emas, kelajak ramziga aylanmoqda.
“Zamin”ni Telegramʻda oʻqing!
