"Real Madrid" hujumkor yarim himoyachisi Arda Guler tizzasidagi jiddiy jarohat sababli joriy mavsumda boshqa maydonga tusholmaydi. Klub rasmiy bayonotida 21 yoshli futbolchining tiklanish muddati aniq ko'rsatilmagan bo'lsa-da, uning uchun yil yakunlangani deyarli aniq bo'lib ulgurdi. Bu xabar Turkiya terma jamoasi uchun ham kutilmagan zarba bo'ldi, chunki Guler bo'lajak jahon chempionatida jamoaning asosiy umidi hisoblanadi. Bu haqda Goal.com xabar beradi.
Madridliklar uchun joriy mavsum omadsiz kechmoqda. Jamoa Chempionlar ligasi chorak finalida "Bavariya"ga imkoniyatni boy berdi, Ispaniya kubogidan erta chiqib ketdi va La Ligada peshqadam "Barselona"dan 9 ochko ortda qolmoqda. Bunday natijalar fonida bosh murabbiy Alvaro Arbeloa mavsum yakunida iste'foga chiqarilishi kutilmoqda. Guler esa jarohatga qadar 50 ta o'yinda 6 ta gol va 14 ta assist qayd etib, o'zining eng yaxshi mavsumini o'tkazayotgan edi.
Turkiya terma jamoasi 2002-yildan buyon ilk bor jahon chempionatiga yo'llanma oldi va Guler saralash bosqichida jamoaning yetakchisi sifatida namoyon bo'ldi. Endilikda u AQSh, Kanada va Meksika mezbonlik qiladigan turnirga qadar to'liq tiklanishga harakat qiladi. Turkiya guruh bosqichida Avstraliya, Paragvay va AQSh terma jamoalariga qarshi bahs olib boradi.
"Real Madrid" tarkibida yo'qotishlar faqat Guler bilan cheklanmadi. Aprel oyida og'ir jarohatdan qaytgan himoyachi Eder Militao ham yana safdan chiqdi. Braziliyalik futbolchining son qismidagi yangi jarohati uning mavsumdagi ishtirokiga nuqta qo'ydi. Bu holat Braziliya terma jamoasi murabbiylar shtabini ham xavotirga solmoqda, chunki Militaoning tez-tez jarohat olishi Gabriel va Markinyosning asosiy tarkibdagi o'rnini mustahkamlamoqda.
“Zamin”ni Telegramʻda oʻqing!
