“Manchester Siti” bosh murabbiyi Xosep Guardiola o‘zining kelajakda murabbiylikdan tanaffus olishi ehtimoli haqida fikr bildirdi. Ispaniyalik mutaxassis BBC nashriga bergan suhbatida o‘z ishiga bo‘lgan munosabati, jamoada yuz berayotgan o‘zgarishlar va kelajak rejalari haqida ochiq gapirdi.
Guardiolaning ta’kidlashicha, u hozircha faoliyatini to‘xtatish haqida o‘ylamayotgan bo‘lsa-da, kelgusida bu haqda fikr yuritishi mumkin.
“Ehtimol, bu haqda 2035 yillarda o‘ylab ko‘rarman. Bir ish bilan uzoq yillar shug‘ullansang, vaqt o‘tishi bilan hamma narsa o‘zgaradi. Bu tabiiy jarayon. Klub, o‘yinchilar, murabbiy — barchasi buni his qiladi”, — dedi u.
Taniqli mutaxassis jamoada so‘nggi paytlarda sodir bo‘layotgan o‘zgarishlarga ham to‘xtalib o‘tdi.
“Biz avvalgi yillardagi jamoa emasmiz. Bunga ko‘p sabablar bor. Ba’zi odamlar ketdi, ayrimlar yangi yo‘l tanladi. Hatto mening murabbiylik shtabimning bir qismi ham klubni tark etdi. Bu futbolning tabiiy qismi”, — dedi Guardiola.
Shu bilan birga, u klub rahbariyati bilan munosabatlari yaxshi ekanini ta’kidladi:
“Mening rahbariyat bilan munosabatlarim a’lo darajada. Ular menga ishonishadi va men ham ularning ishonchini his qilaman. Hozir men bu yerdaman, sizlar oldingizdaman — bu eng muhimi. Keyin nima bo‘lishini vaqt ko‘rsatadi”.
Guardiola so‘nggi yillarda “Manchester Siti” bilan tarixiy natijalarga erishdi: u jamoani Angliya chempionligi, Angliya Kubogi va Chempionlar ligasi g‘olibligiga yetakladi. Shu bilan birga, u hozirgi tarkib bilan ham yangi muvaffaqiyatlarga intilayotganini ta’kidladi.
“Maqsadimiz har doimgidek — yangi g‘alabalar, yangi tarix yaratish. Futbolda barqarorlik oson emas, lekin bizning ishimiz aynan shunda”, — deya so‘zini yakunladi murabbiy.
Guardiolaning bu suhbati futbol jamoatchiligi orasida qizg‘in muhokamalarga sabab bo‘ldi — ko‘pchilik ispaniyalik mutaxassisning “keyin nima bo‘lishini ko‘ramiz” degan gapini uning “Manchester Siti”dagi so‘nggi yillari haqidagi ishora sifatida qabul qilmoqda.
“Zamin”ni Telegramʻda oʻqing!
