Ispaniya terma jamoasi va “Barselona”ning eng yosh yulduzlaridan biri Lamin Yamal muxlislar orasida shov-shuvga sabab bo‘lgan qaror qabul qildi. Endi u odatdagidek imzo tarqatishni to‘xtatdi va faqat maxsus tijorat platformasi orqali o‘z dastxatini sotishni rejalashtirmoqda. Bu haqda Mundo Deportivo nashri ma’lum qildi.
Manbalar xabariga ko‘ra, Yamalning reklama va marketing faoliyatini boshqaruvchi agentlik unga yangi tijorat strategiyasini taklif etgan. Sportchilarning imzolangan kiyimlari, butsilari va boshqa atributlarini sotish bilan shug‘ullanuvchi kompaniya futbolchiga rasmiy shartnoma taklif qilgan.
Shu sababli, Yamal hozircha muxlislar oldida imzo berishni to‘xtatgan, biroq ular bilan suratga tushishni davom ettirmoqda. “Barselona” klubi bu qarorni tabiiy hol sifatida qabul qilgan va bu orqali futbolchining brend qiymati yanada oshishi mumkinligini qayd etgan.
Klub rasmiylarining ta’kidlashicha, hozirda Yamal jamoa doirasida ma’lum miqdordagi imzolar uchun ruxsat berish bo‘yicha muzokaralar olib bormoqda. Uning imzosi bozorda juda kam ekani bois, bu narsa kolleksionerlar uchun yanada qimmatli bo‘lib bormoqda.
Shartnoma hali rasman imzolanmagan bo‘lsa-da, ikki tomon ham kelishuvni yakunlash niyatida ekanligi ma’lum qilingan. Bunday marketing usuli AQSHda, ayniqsa NBA yulduzlari orasida ancha keng tarqalgan bo‘lib, sportchilar imzolarini va shaxsiy brendlarini moddiy qiymatga aylantiradi.
“Barselona” rahbariyati Yamalning qarorini qo‘llab-quvvatlamoqda va uni klub akademiyasining faxri sifatida ko‘radi. Ular yosh futbolchining katta salohiyatini, bozordagi tijoriy qiymatini va imidjini saqlash muhim ekanini ta’kidlashgan.
Ma’lumot uchun, Lamin Yamal bugungi kunda Adidas, Beats, Powerade, Oppo, Konami va Nesquik kabi yirik xalqaro brendlarning rasmiy vakili sanaladi. Shuningdek, u UNICEF elchisi ham hisoblanadi.
Muxlislar uchun bu qaror bir oz g‘alati tuyulsa-da, mutaxassislar fikricha, bu zamonaviy sport industriyasida tabiiy yo‘nalish — yulduzlar nafaqat maydonda, balki bozorda ham o‘z brendini boshqarishni o‘rganmoqda.
“Zamin”ni Telegramʻda oʻqing!
