Jahon boksining taniqli va eng intizomli sportchilaridan biri — Aleksandr Usik o‘zining kelajakda siyosatga qadam qo‘yish niyati yo‘qligini ma’lum qildi. Bu haqda ukrain bokschisi mahalliy ommaviy axborot vositalariga bergan intervyusida so‘z ochdi.
38 yoshli mutlaq jahon chempioni shunday dedi:
“Men siyosatga kirib nima qilaman? Menga bu kerak emas. Agar siyosatchi yoki mer bo‘lsam, kimga ham yordamim tegardi?! Men bu sohada o‘qimaganman, yuridik bilimim yo‘q. Siyosatga ko‘p hollarda o‘g‘irlashni istaydiganlar kiradi. Men esa o‘g‘irlik qilmoqchi emasman. Xudoga shukur, menda barchasi bor. Bularni o‘zim mehnatim bilan topganman va endi ularni boshqa yo‘nalishda ko‘paytirishni xohlayman,” — dedi Usik.
Uning so‘zlariga ko‘ra, sport orqali orttirgan tajribasi, intizomi va mehnati uni hayotda yetarli darajada qondirmoqda. “Men sport orqali odamlarga sabr, ishonch va harakat orqali hammasiga erishish mumkinligini ko‘rsatmoqchiman. Bu siyosatdagilardan ko‘ra ancha to‘g‘ri yo‘l,” — dedi Usik.
Shu bilan birga, chempion o‘zining asosiy diqqatini sportdan tashqari loyihalarga qaratmoqchi ekanligini ham bildirdi. U jismoniy tayyorgarlik markazlarini ochish va yosh bokschilarni qo‘llab-quvvatlash orqali yangi avlod sportchilarini tarbiyalash niyatida.
Bokschi siyosatni “no‘noq va iflos o‘yin” deb atadi. Uning fikricha, ko‘pchilik siyosatga hokimiyat, pul yoki obro‘ uchun kiradi, ammo u odamlarga haqiqiy foyda keltirishni xohlamaydi. “Men hech kimni tanqid qilmoqchi emasman, ammo o‘zimni u dunyodan uzoqroq tutishni ma’qul ko‘raman,” — dedi u.
Eslatib o‘tamiz, Aleksandr Usik 26 iyul kuni bo‘lib o‘tgan katta boks oqshomida britaniyalik raqibi Daniyel DyubuanI beshinchi raundda nokautga uchratgan edi. Bu g‘alaba Usikning unvonlarini yana bir bor mustahkamladi va uni professional boksdagi eng muvaffaqiyatli chempionlardan biri sifatida tarixga kiritdi.
Muxlislar Usikning so‘zlarini samimiy qabul qilishdi. Ko‘pchilik uning siyosatdan uzoq turish qarorini qo‘llab-quvvatlab, “U o‘zini emas, xalqni o‘ylaydigan odam,” deb ta’rifladi.
Hozirda Usik boksdan keyingi faoliyatini rejalashtirayapti va u sportdagi nomini toza, obro‘sini mustahkam saqlab qolishni asosiy maqsad deb biladi.
“Zamin”ni Telegramʻda oʻqing!
