Portugaliya chempionati so‘nggi yillarda yosh iste’dodlar fabrikasiga aylanib ulgurdi. Ushbu musobaqada o‘z nomini tez sur’atda tanitgan futbolchilardan biri — “Famalikan” klubi yarim himoyachisi Gushtavu Sa bo‘ldi, deb yozdi Calciomercato.
Manbaning ma’lum qilishicha, 20 yoshli portugal futbolchiga hozirning o‘zida Yevropaning ikki yetakchi klubi — “Manchester Siti” va “Yuventus” jiddiy qiziqish bildirmoqda. Har ikki jamoa uning o‘yin uslubi va universal qobiliyatini yuqori baholagan.
Gushtavu Sa futbol sirlarini “Port-u” akademiyasida o‘rgangan va keyinchalik “Famalikan” yoshlar tizimiga qo‘shilgan. 2022-yildan buyon asosiy jamoa safida muntazam o‘ynab kelayotgan yarim himoyachi jamoa markazida, ayniqsa hujumchi ortida faol harakat qilishi bilan tanilgan.
Futbolchi bilan amaldagi shartnoma 2029-yilning 30-iyuniga qadar mo‘ljallangan. Transfermarkt ma’lumotlariga ko‘ra, uning bozor qiymati 16 million yevroga baholangan. Ammo “Famalikan” rahbariyati uning kelajagi porloq ekanini yaxshi bilgani uchun shoshilmayapti.
Gushtavu Sa texnik jihatdan yetuk, paslar aniqligi va maydonni ko‘ra bilish qobiliyati bilan ajralib turadi. Mutaxassislar fikricha, u zamonaviy yarim himoyachi uchun kerakli barcha fazilatlarga ega.
Taxminlarga ko‘ra, qishki transfer oynasida “Siti” va “Yuventus” o‘rtasida uning uchun jiddiy tortishuv bo‘lishi mumkin. Gvardiola uni kelajakda “Siti”ning markaziy bo‘g‘inidagi muhim figura sifatida ko‘rsa, italiyaliklar esa uni kelajakdagi “Pogba” sifatida baholamoqda.
Shunday qilib, Portugaliya futboli yana bir yosh yulduzni dunyoga tanitayotgan ko‘rinishi bor — Gushtavu Sa yaqin yillarda Yevropadagi eng qiziqarli transferlardan biriga aylanishi mumkin.
“Zamin”ni Telegramʻda oʻqing!
