“Manchester Yunayted”ning sobiq sardori va afsonaviy yarim himoyachisi Roy Kin jamoaning Angliya Premer-ligasida “Liverpul” ustidan qozongan 2:1 hisobidagi g‘alabasini ijobiy baholadi, deb xabar berdi skysports.com.
Kinning fikricha, “Yunayted” endi har bir o‘yinda raqib darvozasi uchun haqiqiy xavf tug‘dira oladi va bu jamoada so‘nggi mavsumda yetishmagan muhim jihat edi.
“Bu “Manchester Yunayted”dan endi gol kutish mumkin. Ular o‘tgan mavsumda bunday kuchli hujum potensialiga ega emasdi. G‘alabalar ishonchni oshiradi, lekin bu faqat boshlanish xolos. Asosiysi — barqarorlikni saqlab, butun mavsum davomida shunday o‘yin namoyish etish,” — dedi Roy Kin.
Sobiq irlandiyalik futbolchi jamoa bosh murabbiyi Ruben Amorim haqida ham alohida to‘xtalib o‘tdi:
“Agar “Yunayted” shu darajadagi o‘yinni saqlab qolsa, Amorim kamida uch yil davomida bu lavozimda ishlashga haqli. U jamoaga yangi ruh, ishonch va g‘alaba kayfiyati olib kirdi.”
Eslatib o‘tamiz, APLning 8-turida “Yunayted” “Enfild”da “Liverpul”ni 2:1 hisobida mag‘lub etdi. Bu g‘alaba bilan Ruben Amorim shogirdlari musobaqa jadvalida 9-o‘ringa ko‘tarildi.
Mutaxassislar fikricha, “Yunayted”ning bu g‘alabasi jamoa uchun yangi davrning boshlanishi bo‘lishi mumkin. Chunki Amorimning taktik yondashuvi va o‘yinchilarga bo‘lgan ishonchi jamoada ijobiy muhit yaratdi.
Shu tariqa, “qizil iblislar” navbatdagi bellashuvlar oldidan kuchli ruhda tayyorgarlik ko‘rmoqda. Roy Kinning ta’kidlashicha, agar “Yunayted” shunday rivojlanishda davom etsa, ular Premer-ligada yana yuqori maqsadlar uchun kurasha oladi.
“Zamin”ni Telegramʻda oʻqing!
