Real Gülerning 75-oʻyin bonusi uchun 2 mln toʻlaydi

Ispaniya chempionatining 11-turi doirasida Madridning "Real" klubi "Valensiya" ustidan 4:0 hisobida yirik gʻalabaga erishdi. Ushbu oʻyinda "Real"ning turkiyalik yarim himoyachisi Arda Güler ham maydonga tushdi.

Bu bellashuv Güler uchun "Qirollik klubi" tarkibidagi 75-oʻyin boʻldi. Diario ASning maʼlumotiga koʻra, "Real" rahbariyati ushbu oʻyindan soʻng "Fenerbahche" klubiga 2 million yevro bonus toʻlashi kerak.

Eslatib oʻtamiz, Güler 2023-yilning yozida Madrid klubiga transfer qilingan edi. U "Real" safida oʻtkazgan 75 oʻyinda 15 ta gol urib, 17 ta golli uzatmani amalga oshirgan.

Futbolchining shartnomasi 2029-yil oʻrtalarigacha moʻljallangan boʻlib, uning transfer qiymati hozirda 60 million yevroga baholanmoqda.

Sardor Ergashev

«ZAMIN.UZ» muharriri