“Barselona” bosh murabbiyi Hans-Diter Flik Chempionlar Ligasining 4-turida “Bryugge”ga qarshi o‘yindan so‘ng jamoa o‘yini haqida ochiq fikr bildirdi. Belgiyada bo‘lib o‘tgan bellashuv juda dramatik o‘tdi — katalonlar bir necha bor hisobda oldinga chiqishganiga qaramay, uchrashuv 3:3 hisobida durang bilan yakunlandi.
Flikning so‘zlariga ko‘ra, o‘yin juda og‘ir kechgan va jamoa ko‘plab kurashlarda yutqazgan:
“Uchrashuv oson kechmadi. Bizda gol urish uchun yetarlicha imkoniyat bo‘ldi, lekin raqib juda zich himoyalandi, agressiv va intizomli harakat qildi. Ayniqsa, maydon markazidagi kurashlarda yutqazdik. Natijada pressingni to‘liq bajara olmadik va raqib bizga bosimni yaxshi qo‘lladi”, — dedi murabbiy.
Tajribali mutaxassis himoya chizig‘idagi kamchiliklarga ham e’tibor qaratdi:
“Bunday o‘yinlarda darvozani himoya qilish oson emas. Himoya faqat orqa chiziq emas — yarimhimoyachilar ham himoyada ko‘proq yordam berishi kerak. Biz bu borada ishlashimiz, tahlil qilishimiz shart. Ayrim jihatlarni albatta o‘zgartirish lozim, lekin asosiy falsafamizga xiyonat qilmaymiz. Axir biz — “Barselona”miz.”
Flikning ta’kidlashicha, jamoa uslubini o‘zgartirish shart emas, faqat uni to‘liq amalga oshirishda shiddat yetishmayapti:
“Masala falsafada emas, uni qanday bajarayotganimizda. Agar tezlik va intizom bo‘lmasa, imkoniyat ham bo‘lmaydi. Chempionlar Ligasida raqiblar hujumga juda tez o‘tadi, “Bryugge” buni ajoyib bajardi. Biz himoyada ortiqcha bo‘shliq qoldirdik, lekin shu holatda ham o‘yinni qutqara oldik.”
Murabbiy natijadan qoniqmaganini yashirmadi, ammo jamoaning ruhiyatini e’tirof etdi:
“3:3 – bu yaxshi natija emas, lekin biz so‘nggi daqiqalarda kurashdik, qayta tiklandik va xarakter ko‘rsatdik. Bu yo‘lda yana ishlashimiz kerak. Biz haqiqiy “Barselona” bo‘lish uchun hali ancha mehnat qilishimiz zarur”, — deya fikrini yakunladi Hans-Diter Flik.
“Zamin”ni Telegramʻda oʻqing!
