Qatarda bo‘lib o‘tayotgan U-17 yoshlar o‘rtasidagi jahon chempionatida guruh bosqichi rasman yakunlandi. O‘zbekiston o‘smirlar terma jamoasi bu bosqichda muvaffaqiyatli ishtirok etib, 6 ochko to‘pladi va “J” guruhida 2-o‘rinni egallab, musobaqaning pley-off bosqichiga yo‘llanma oldi.
Islombek Ismoilov boshchiligidagi yoshlarimiz guruhda Panama va Paragvay ustidan ishonchli g‘alabalar qozondi. Faqat Irlandiya bilan bo‘lgan bahsdagi yo‘qotilgan ochko ularni guruh yetakchiligidan bir pog‘ona pastga tushirdi. Shunga qaramay, jamoa o‘z o‘yini, intizomi va jamoaviy harakati bilan muxlislar qalbidan joy oldi.
Endilikda terma jamoamizni yanada mas’uliyatli sinov — pley-offdagi Xorvatiya terma jamoasiga qarshi bahs kutmoqda. Yevropa vakillari “C” guruhida ishtirok etib, 7 ochko bilan 2-o‘rinni egalladi. Senegal esa to‘plar nisbati va ko‘rsatkichlar bo‘yicha ularni ortda qoldirib, guruh peshqadami sifatida yakunladi.
Xorvatiya va O‘zbekiston o‘rtasidagi bellashuv 14-noyabr kuni bo‘lib o‘tadi. Ushbu uchrashuv jamoamiz uchun muhim bosqich hisoblanadi, chunki g‘olib chorak finalga yo‘l oladi. Agar O‘zbekiston bu bosqichdan muvaffaqiyatli o‘tsa, navbatdagi raqib Avstriya — Chexiya juftligi g‘olibi bo‘ladi.
O‘zbekiston o‘smirlar terma jamoasi bugungacha o‘z o‘yini orqali maydonda kurashchanlik, ishtiyoq va ishonchni namoyon etdi. Islombek Ismoilov shogirdlari nafaqat natija, balki ruhiy jihatdan ham barqaror jamoa ekanini isbotlashmoqda. Panama ustidan 6:1 hisobida qozongan g‘alaba va Paragvayga qarshi chiroyli o‘yin jamoa kayfiyatini yuqori darajada saqlab turibdi.
Xorvatiya esa texnik va jismoniy jihatdan murakkab raqib sanaladi. Ular Yevropa an’analariga xos ravishda pasga asoslangan futbol o‘ynaydi, ammo tezkorlikda va jarima maydoni atrofidagi faol harakatda o‘zbek futbolchilari ustunlikka erishishi mumkin.
Murabbiylar shtabi hozirda jamoa bilan jiddiy tayyorgarlik jarayonida. Islombek Ismoilov suhbatlaridan birida shunday degan edi:
“Biz uchun har bir bosqich — yangi imkoniyat. Har bir o‘yinda yoshlar tajriba orttirmoqda. Pley-offdagi bellashuvda ham Vatan sharafini munosib himoya qilish uchun barcha kuchni safarbar etamiz.”
Futbol ekspertlari ham O‘zbekiston yoshlar jamoasi imkoniyatlarini ijobiy baholamoqda. Ular fikricha, jamoa har bir o‘yinda o‘sish ko‘rsatmoqda va bu tendensiya pley-offda ham davom etishi mumkin.
14-noyabr kuni bo‘lib o‘tadigan bahs nafaqat musobaqa taqdiri, balki yosh avlod futbolchilarining xalqaro tajribasi uchun ham katta ahamiyat kasb etadi. Milliy jamoa muxlislari esa bu o‘yinni katta umid va ishonch bilan kutib turishibdi — chunki bu yoshlar bizning kelajak futboliga asos bo‘layotgan yangi avlod va ularning ruhi haqiqiy g‘alaba uchun yetarli ko‘rinadi.
“Zamin”ni Telegramʻda oʻqing!
