Ispaniyaning Linares shahri 18–23-noyabr kunlari ayollar o‘rtasidagi World Women’s Team Championship 2025 musobaqasiga mezbonlik qilmoqda. Ushbu nufuzli chempionatda O‘zbekiston ayollar terma jamoasi ilk bor ishtirok etayotgani bilan ham alohida ahamiyatga ega. Musobaqaning dastlabki kunlari ortda qoldi va qizlarimiz o‘zlariga xos qat’iyat va iroda bilan kuchli raqiblar qarshisida yuksak g‘ayrat ko‘rsatishdi.
Birinchi to‘rt turning natijalari quyidagicha shakllandi:
• 1-tur: Gruziya – O‘zbekiston 3,5 : 0,5
Yurtimiz shaxmatchilari favoritlardan biri bo‘lgan Gruziyaga qarshi bor kuchini ishga soldi, ammo raqib jiddiy qarshilik ko‘rsatdi.
• 2-tur: O‘zbekiston – Xitoy 1,5 : 2,5
Jahonning yetakchi shaxmat maktablaridan biri bo‘lgan Xitoyga qarshi jamoamiz munosib o‘yin ko‘rsatib, ishtirokni yanada ishonchli davom ettirdi.
• 3-tur: Fransiya – O‘zbekiston 1 : 3
Uchinchi turda o‘zbek qizlari juda zarur g‘alabani qo‘lga kiritdi. Fransiya ustidan ishonchli tarzda zabt etilgan 3:1 hisobidagi zafar jamoaga yangi ruhiy ko‘tarinkilik baxsh etdi.
• 4-tur: Ukraina – O‘zbekiston 1 : 3
To‘rtinchi turda yana bir muhim g‘alaba. Ukraina kabi tajribali raqib ustidan qo‘lga kiritilgan 3:1 natijasi jamoamizni pley-off yo‘lida jiddiy da’vogarga aylantirdi.
E’tiborlisi, har bir guruhdan faqat TOP-4 jamoa chorak finalga yo‘l oladi. Hozirgi sharoitda O‘zbekiston uchun hal qiluvchi bellashuv oldinda – jamoamizni Hindistonga qarshi o‘ta muhim bahs kutib turibdi. Agar qizlarimiz ushbu o‘yinde ham yuqori natija qayd etsa, shaxmat tariximizda yana bir yangi sahifa ochilishi mumkin.
O‘zbek sport jamoatchiligi va shaxmat muxlislari terma jamoamizning keyingi qadamlarini katta shavq bilan kuzatmoqda. Orzu, mehnat va irodaning uyg‘unligi qizlarimizga yangi zafarlar eshigini ochishiga ishonch katta.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
