Turkiya Superligasining 14-turida «Istanbul Bashakshehir» safarda «Kasimpasha»ni 3:1 hisobida mag‘lub etdi. Bellashuvda ikki o‘zbekistonlik legioner — Eldor Shomurodov va Abbosbek Fayzullayevning gol urishdagi faol ishtiroki klub g‘alabasiga yanada chiroy bag‘ishladi. Uchrashuvdan keyin jamoa bosh murabbiyi Nuri Shahin ikki futbolchi haqida iliq fikrlar bildirdi.
Shomurodov — yuqori mahorat, kamtar xulq
Murabbiy Eldor haqida alohida to‘xtalib, uning ham inson sifatida, ham futbolchi sifatida yuqori darajada ekanini aytdi.
«Eldor nafaqat kuchli hujumchi, balki juda samimiy va kamtarin inson. Unda hech qanday yulduzlikka xos qo‘pol xulq yo‘q. Nima desak, ochiq yurak bilan amalga oshiradi — asl professional», — dedi Shahin.
Shomurodov bellashuvning eng so‘nggi daqiqalarida jamoaning uchinchi golini kiritib, g‘alabani mustahkamlab berdi.
Fayzullayev — o‘yin taqdirini o‘zgartiruvchi futbolchi
Abbosbek Fayzullayev musobaqaning 26-daqiqasida jarima zarbasidan yurakdan tepilgan go‘zal goli bilan hisobni ochgan edi. Nuri Shahin uning o‘yinini quyidagicha baholadi:
«Abbosbek va Amine Harit yozda yangi mamlakatga moslashishda qiynalishdi. Lekin biz ularning salohiyatini yaxshi bilganimiz uchun ishondik. Ikkalasi ham o‘yin taqdirini bir lahzada o‘zgartirishi mumkin bo‘lgan futbolchilar. Bugun ham g‘alabamizda muhim rol o‘ynashdi».
Shahin shuningdek, Fayzullayevning yaqinda jarohatdan qaytganini ta’kidlab, qishki tanaffusga kelib u yana haqiqiy formasiga kirishini ishonch bilan aytib o‘tdi.
O‘zbek legionerlari Turkiya chempionatida o‘z nomini yana bir bor baland ovozda yangratdi. «Bashakshehir»ning bu g‘alabasi jamoaning jadvalda yuqoriga ko‘tarilishiga xizmat qilgan bo‘lsa, Shomurodov va Fayzullayevning o‘yini muxlislarda yanada katta umid uyg‘otdi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
