Turkiya Superligasining 14-turidan o‘rin olgan muhim to‘qnashuvda “Istanbul Bashakshehir” safarda “Kasimpasha”ni 3:1 hisobida mag‘lub etdi. Bu o‘yin nafaqat jamoa uchun, balki ikki hamyurtimiz — Eldor Shomurodov va Abbosbek Fayzullayev uchun ham quvonchli voqeaga aylandi. Chunki ularning har biri bir goldan urdi va jamoaning muhim g‘alabasida asosiy rolni o‘ynadi.
Bellashuvdan keyin bosh murabbiy Nuri Shahin matbuotga o‘z fikrlari bilan bo‘lishib, o‘yindagi muhim jihatlarga to‘xtalib o‘tdi.
"Birinchi bo‘limda rejamiz o‘tdi, ikkinchisida yetishmayotgan jihatlar ko‘rindi"
Shahinning ta’kidlashicha, uchrashuvning dastlabki qismi jamoa rejalashtirgan ssenariy asosida kechdi. Murabbiy raqibning ikki xil taktikadan foydalanishi mumkinligini oldindan hisobga olgan va futbolchilar bunga yaxshi tayyorgarlik ko‘rgan.
— Birinchi bo‘limda shogirdlarim barcha ko‘rsatmalarni bajarishdi, o‘yinni nazorat qildik va bizni qoniqtiradigan hisobni qo‘lga kiritdik, — dedi murabbiy.
Biroq ikkinchi taymda vaziyat o‘zgarganini ham yashirmadi:
— Ikkinchi bo‘limni ideal deb ayta olmayman. Bu holat bir necha bor takrorlanmoqda. Kuch taqsimoti, o‘yin intizomi va 90 daqiqa davomida barqarorlikda o‘sishimiz zarur. Agar bu jihatlarni yo‘lga qo‘ysak, bizdan juda kuchli jamoa chiqadi.
"Bir kishi kam bo‘lib qolish o‘yinni qiyinlashtirdi"
Shahinning aytishicha, uchrashuvda “Bashakshehir” noo‘rin vaziyat tufayli bir futbolchisiz qolgan va bu esa jamoadan qo‘shimcha mehnat talab qilgan.
— Bir kishi kam bo‘lib qolganimiz vaziyatni og‘irlashtirdi. Shundan keyin qo‘shimcha energiya sarflashga to‘g‘ri keldi, — dedi u.
"Trabzonspor"ga qarshi mag‘lubiyatdan keyin bu g‘alaba — davo"
Murabbiy o‘tgan turdagi mag‘lubiyatdan keyin bu g‘alaba jamoa uchun katta ruhiy quvvat berganini ta’kidladi:
— Uch ochko olganimizdan juda xursandman. Ayniqsa, “Trabzonspor”ga qarshi alamli mag‘lubiyatdan keyin bu g‘alaba biz uchun haqiqiy davo bo‘ldi. Oldinda uzoq yo‘l bor, ammo biz to‘g‘ri yo‘ldamiz. Ishonamanki, oxir-oqibat munosib muvaffaqiyatga erishamiz.
Shu bilan birga, Eldor Shomurodov va Abbosbek Fayzullayevning gollari jamoaga muhim burilish olib keldi va bu ikki futbolchining formada ekanini yana bir bor ko‘rsatdi. Muxlislar uchun bu g‘alaba — ikki karra quvonch: jamoa yutdi, o‘zbekistonliklarning o‘yini yorqin chiqdi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
