So‘nggi haftalarda O‘zbekiston terma jamoasi va Eronning “Persepolis” klubida maydonga tushayotgan Oston O‘runov butun futbol jamoatchiligining diqqat markaziga aylandi. Uning o‘tkir texnikasi, tezkor qarorlari va hujumdagi faolligi jamoasiga katta jon bag‘ishlayotgani ta’kidlanmoqda.
Eronlik mutaxassis Ali Mansuriyan ham O‘runovning so‘nggi holati muhokamada ekanini tan oldi. Uning fikricha, o‘zbekistonlik vinger qaytadan eng yuqori formasiga qaytdi va “Persepolis”da o‘z imkoniyatlarini to‘liq namoyon etmoqda.
“O‘runov kabi texnik jihatdan yuksak darajadagi futbolchilar birinchi navbatda ishonch va hurmat kutadi. Ularga chegara emas, keng maydon va erkinlik kerak. Chunki u bir harakati bilan raqibning ikki-uch futbolchisini bemalol chalg‘itib o‘tadi”, — dedi murabbiy “Shabhaye Footballi” dasturida.
Ostonning rivojiga oid fikrlar ijtimoiy tarmoqlarda ham qizg‘in muhokama qilindi. Foydalanuvchilar O‘runovning vaziyatini “Real Madrid” yulduzi Vinisius bilan taqqoslab berishdi:
“Anchelotti davrida Vinisiusga erkinlik berilgan — shuning uchun u maydonning hamma joyida ko‘rinardi. Hozirgi Xabi Alonso davridagi o‘yini bilan o‘sha payt orasida katta farq bor”, — deb yozishdi muxlislar.
Ma’lumot o‘rnida, O‘runov “Persepolis”ning oxirgi bahsida yana bir bor o‘z mahoratini namoyon etdi. Uning goli jamoaga “Shams Azar” ustidan muhim g‘alaba keltirdi va uning formasi yanada kuchayib borayotganini ko‘rsatdi.
Tahlilchilar fikricha, agar O‘runovga shu tarzda ishonch va erkinlik berishda davom etsa, u nafaqat Eron chempionatida, balki Osiyodagi eng yorqin yarimhimoyachilardan biriga aylanishi mumkin.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
