Nufuzli Goal nashri 2026 yilgi Jahon chempionatida zafar quchishi ehtimol bo‘lgan terma jamoalar reytingini e’lon qildi. Ushbu ro‘yxatda O‘zbekiston milliy terma jamoasi 32-pog‘onani egalladi va jamoamizning mundialdagi salohiyati haqida alohida tahlil berildi.
Nashr ta’kidlashicha, bu natija o‘zbekistonlik futbol muxlislari uzoq muddat intiq kutib kelgan tarixiy on bilan bog‘liq: mamlakatimiz ilk bor jahon birinchiligi bo‘ladigan musobaqaning final bosqichiga yo‘l oldi. Ammo bu yo‘l oson kechmadi.
Katanes ketdi, Kapadze ishni davom ettirdi – yo‘llanma qo‘lga kiritildi
Saralash bosqichida bosh murabbiy Srechko Katanes sog‘liq bilan bog‘liq qiyinchiliklar tufayli vazifasini tark etdi. Yanvardagi bu o‘zgarishdan so‘ng, jamoani sobiq futbolchi Timur Kapadze qabul qilib oldi va Sloveniyalik mutaxassis boshlab bergan ishni muvaffaqiyatli yakunlashga erishdi.
5-iyun kuni BAAga qarshi kechgan 0:0 hisobidagi murosasiz durang O‘zbekistonga tarixiy mundial yo‘llanmasini taqdim etdi. Mana shunday mas’uliyatli pallada jamoa bosimga dosh berdi va o‘z maqsadiga erishdi.
Kannavaro qo‘l ostidagi O‘zbekiston – yanada jips va taktik jihatdan kuchli
Yakuniy bosqichda esa milliy jamoamizni Italiya futboli afsonalaridan biri, jahon chempioni Fabio Kannavaro boshqarishi ma’lum qilindi. Goal’ning yozishicha, Kannavaro qo‘l ostida jamoa ancha jonlangan — o‘tgan oy Al Ayn xalqaro kubogida O‘zbekiston avvaliga Misrni mag‘lub etdi, finalda esa Eronni penaltilar seriyasida ortda qoldirib, musobaqa kubogini qo‘lga kiritdi.
Bu g‘alabalar terma jamoaning psixologiyasi, jamoaviy o‘yini va taktik qarashlarining to‘g‘ri yo‘nalishda shakllanayotganini ko‘rsatib turibdi.
Pley-offga chiqish uchun himoyaning roli hal qiluvchi bo‘ladi
Goal tahlilchilariga ko‘ra, O‘zbekistonning pley-off umidlari, avvalo, himoyaning barqaror o‘yiniga bog‘liq bo‘ladi. Mudofaa markazida esa “Manchester Siti” tarkibida faoliyat yuritadigan Abduqodir Husanov yetakchi sifatida maydonga tushishi kutilmoqda.
Uning zimmasiga juda katta mas’uliyat yuklanadi — jamoamiz Portugaliyaga qarshi o‘yinda Krishtianu Ronalduni, Kolumbiyaga qarshi bahsda esa Luis Diasni to‘xtatish kabi o‘ta mushkul vazifalarni bajarishi talab etiladi.
Favoritlar ham aniqlandi
Goal nashrining taxminlariga ko‘ra, Ispaniya, Argentina va Angliya 2026 yilgi mundialning bosh favoritlari sifatida ko‘rilmoqda. Ammo reytingda O‘zbekistonning joy olishi ham jamoamizga bo‘lgan ishonch balandligidan dalolat beradi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
