Fransiya terma jamoasi 2026 yil mart oyidagi muhim o‘rtoqlik uchrashuvlari uchun raqiblarini rasman belgiladi. Dide Desham shogirdlari Jahon chempionatiga tayyorgarlik jarayonini AQSHda o‘tkaziladigan ikki kuchli bellashuv bilan boshlaydi.
Ma’lum qilinishicha, “Les Bleus” avvalo 26 mart kuni JCHda doimiy favoritlardan biri sanalgan Braziliyaga qarshi maydonga tushadi. Oradan ko‘p o‘tmay, 29 martda ularga Kolumbiya terma jamoasi raqib bo‘ladi. Har ikki o‘yin ham Fransiyaning taktik tayyorgarligi, tarkibdagi yangi qo‘shimchalar va o‘yin uslubini yanada shakllantirish uchun katta ahamiyat kasb etadi.
Bu sinovlar Fransiya uchun ayniqsa muhim — chunki JCH-2026 qur’asiga ko‘ra, ular Senegal, Norvegiya va pley-off g‘olibi (Boliviya, Surinam yoxud Iroq) bilan birga I guruhidan o‘rin olgan. Bu kvartet oson deb bo‘lmaydi, ayniqsa Afrika chempioni Senegal va muntazam o‘sish ko‘rsatayotgan Norvegiya kabi raqiblar bilan kurash o‘ta murosasiz bo‘lishi aniq.
Fransiya shu ikki o‘rtoqlik o‘yini orqali jamoa o‘yin ritmini topish, hujum va himoyadagi kamchiliklarni bartaraf etish hamda JCH oldidan psixologik ustunlikni qo‘lga kiritishni maqsad qilgan. Jumladan, yangi yosh futbolchilarning imkoniyatlarini sinovdan o‘tkazish ham Desham rejasining bir qismi hisoblanadi.
AQSHdagi bellashuvlar nafaqat murabbiylar, balki millionlab muxlislar tomonidan ham katta qiziqish bilan kuzatilishi turgan gap. Zero, Fransiyaning Braziliya va Kolumbiyaga qarshi o‘yinlari global futbol hamjamiyati uchun ham o‘ziga xos “mini-festival” bo‘ladi.
Fransiya termasi uchun navbatdagi bosqich — guruhdagi yanada jiddiy raqobat. Shu bois mart oyidagi bu ikki qarshi uchrashuv ularning chempionat oldidan qay darajada tayyor ekanini ko‘rsatib beradi.
“Zamin”ni Telegramʻda oʻqing!
