Madridning «Real» klubi yozgi transferlar oynasida jiddiy o‘zgarishlarga qo‘l urishni rejalashtirmoqda. Ispaniya va xorij OAVlarida tarqalayotgan xabarlarga ko‘ra, «qaymoqranglilar» rahbariyati jamoa tarkibini optimallashtirish va moliyaviy balansni yaxshilash maqsadida bir yo‘la sakkiz nafar futbolchi bilan xayrlashishga tayyor.
Manbalarning ta’kidlashicha, klub asosan mavsum davomida o‘zini to‘liq namoyon eta olmagan yoki asosiy tarkibdan muntazam o‘rin topishda qiynalayotgan futbolchilarni sotish orqali katta mablag‘ ishlab olishni ko‘zlamoqda. Ushbu ro‘yxatda birinchi bo‘lib braziliyalik vinger Rodrigo nomi tilga olinmoqda. Madrid klubi uni sotishdan eng katta foyda olishi mumkin, deb hisoblanmoqda.
Shuningdek, zaxira darvozaboni Andrey Lunin ham jamoani tark etishi mumkin bo‘lgan futbolchilar safiga kiritilgan. Himoya chizig‘ida esa Ferlan Mendi va Fran Garsiya bilan xayrlashish varianti ko‘rib chiqilmoqda. Yarim himoyada Dani Sebalos, Braim Dias va Eduardo Kamavinga ham kelajagi noaniq bo‘lgan o‘yinchilar qatorida tilga olinmoqda. Hujumchi Gonsalo Garsiya ham yozda «Real»dan ketishi ehtimol qilinmoqda.
Klub rahbariyati bu qarorlar orqali yangi transferlar uchun mablag‘ ajratish va jamoani yanada raqobatbardosh qilishni maqsad qilgan. Ayni paytda «Real» Ispaniya La Ligasining 16-turidan so‘ng 36 ochko jamg‘arib, turnir jadvalida ikkinchi pog‘onada bormoqda.
Yozgi transferlar oynasi «qirollik klubi» uchun faol va keskin qarorlarga boy bo‘lishi kutilmoqda. Muxlislarni esa oldinda qiziq va muhim yangiliklar kutib turibdi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
