«Manchester Siti» Angliya ichki musobaqalarida yana bir o‘ziga xos rekordni o‘z nomiga yozdirdi. Liga kubogi chorak finalida «Brentford»ni 2:0 hisobida mag‘lub etgan mankunianliklar mamlakat kuboklari tarixidagi eng barqaror jamoalardan biri ekanini yana bir bor isbotladi.
Ushbu g‘alabadan so‘ng «shaharliklar» Xosep Gvardiola jamoani qabul qilib olgan 2016 yildan buyon 13-marta Angliya kubok musobaqalari yarimfinaliga chiqishga muvaffaq bo‘ldi. E’tiborlisi, shu davr oralig‘ida Angliya Premer-ligasida ishtirok etuvchi biror klub bunday natija qayd etmagan.
Pep Gvardiola rahbarligida «Siti» Liga kubogida alohida ustunlik namoyish etdi. Jamoa 2017/18, 2018/19, 2019/20 va 2020/21 yilgi mavsumlarda ushbu musobaqaning yarimfinaliga chiqibgina qolmay, har safar kubokni qo‘lga kiritishga erishdi. Bu esa ispaniyalik mutaxassisning turnirdagi mutlaq hukmronligini ko‘rsatadi.
Angliya kubogida ham «Manchester Siti» doimiy ravishda so‘nggi bosqichlargacha yetib kelmoqda. Xususan, jamoa 2016/17, 2018/19, 2019/20, 2020/21, 2021/22, 2022/23, 2023/24 va joriy 2024/25 yilgi mavsumlarda yarimfinalgacha yetib borgan. Ushbu yurishlardan ikkitasi jamoa uchun to‘liq muvaffaqiyat bilan yakunlanib, «shaharliklar» mamlakatning eng nufuzli kubogini qo‘lga kiritgan.
Bu raqamlar «Manchester Siti»ning so‘nggi yillarda Angliya futbolidagi barqarorligi, kubok bahslaridagi tajribasi va ruhiy ustunligini yaqqol namoyon etadi. Gvardiola jamoasi uchun yarimfinallar oddiy bosqichga aylangan, muxlislar esa har mavsum yangi sovrinlarga umid bilan qaramoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
