2026 yilning 6–24 yanvar kunlari Saudiya Arabistonida 23 yoshgacha bo‘lgan futbolchilar o‘rtasida Osiyo kubogining final bosqichi bo‘lib o‘tadi. Qit’aning eng kuchli yoshlar jamoalari jam bo‘ladigan ushbu nufuzli musobaqada O‘zbekiston futbol hakamlik maktabi vakillari ham munosib ishtirok etadi.
Ma’lumotlarga ko‘ra, turnirga o‘zbekistonlik hakamlar jamoasi va inspektorlar rasman jalb qilingan. Bu esa mamlakatimiz hakamlariga Osiyo miqyosida ishonch ortib borayotganidan dalolat beradi.
Final bosqichida uchrashuvlarni bosh hakam sifatida Asker Najafaliyev boshqaradi. Uning qanotlardagi ishonchli yordamchilari sifatida Ruslan Serazetdinov va Baxtiyorxo‘ja Shavkatov faoliyat yuritadi. Zamonaviy futbolda muhim ahamiyat kasb etayotgan VAR tizimida esa Firdavs Norsafarov hakam sifatida ish olib boradi.
Shuningdek, Valentin Kovalenko turnirda inspektor sifatida qatnashib, hakamlik jarayonlari va qarorlarini baholash bilan shug‘ullanadi. Bu kabi mas’uliyatli vazifalarga tayinlanish o‘zbekistonlik mutaxassislarning tajribasi va salohiyatiga berilgan yuqori bahodir.
Qayd etish joizki, U-23 Osiyo kubogi nafaqat yosh futbolchilar uchun, balki hakamlar uchun ham katta sinov va tajriba maydoni hisoblanadi. Mazkur musobaqada muvaffaqiyatli ish olib borish kelgusida yanada yirik xalqaro turnirlarga yo‘l ochishi mumkin.
O‘zbek hakamlarining Saudiya Arabistonidagi nufuzli musobaqada ishtirok etishi milliy futbolimiz obro‘si oshib borayotganining yana bir yaqqol isboti bo‘ldi. Muxlislar esa ularning adolatli va ishonchli faoliyatiga ishonadi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
