Turkiya Superligasining navbatdagi bahsida "Bashakshehir" o‘z maydonida "Gaziantep" jamoasini qabul qiladi. Uchrashuv Toshkent vaqti bilan soat 19:00 da start oladi va muxlislar uchun alohida qiziqish o‘yg‘otmoqda.
Mazkur bellashuv o‘zbek futbol ishqibozlari uchun ham o‘ziga xos ahamiyatga ega. Chunki mezbonlar tarkibida Eldor Shomurodov va Abbosbek Fayzullayev uchrashuvni ilk daqiqalardan asosiy tarkibda boshlaydi. Bu esa jamoaning hujumdagi umidlari aynan ularga bog‘lanayotganini ko‘rsatadi.
Bosh murabbiy Nuri Shahin ushbu o‘yin uchun ancha muvozanatli tarkibni tanlagan. Darvozani Muhammad qo‘riqlaydi, himoya chizig‘ida Onur Bulat, Duarte, Opoku va jamoa sardori Omer Ali joy olgan. Maydon markazida Onur Ergun hamda Umut o‘yinni nazorat qiladi. Hujumda esa Harit, Selke bilan birga Fayzullayev va Shomurodov raqib himoyasini bezovta qiladi.
«Bashakshehir» bu bahsda o‘z maydonida g‘alaba qozonib, turnir jadvalidagi o‘rnini yaxshilashni maqsad qilgan. «Gaziantep» esa ochkolar uchun kurashni qat’iy olib borishi aniq. Shu boisdan, bu o‘yin keskin va murosasiz o‘tishi kutilmoqda.
O‘zbek legionerlarining asosiy tarkibda maydonga tushishi esa uchrashuvga yanada qiziqish qo‘shmoqda. Muxlislar Fayzullayevning texnikasi va Shomurodovning gollarga chanqoq o‘yinini katta umid bilan kutmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
