"Real Madrid" va Braziliya terma jamoasi hujumchisi Endrik yaqin orada "Lion" futbolchisiga aylanishi kutilmoqda. Bu haqda ishonchli manba sifatida tanilgan jurnalist Fabritsio Romano xabar berdi.
Ma’lumotlarga ko‘ra, kelishuv ijara asosida tuzilgan bo‘lib, shartnomaga sotib olish bandi kiritilmagan. Shu bilan birga, forvard maoshining 50 foizi “Lion” tomonidan qoplab beriladi. Bu qaror har ikki tomon uchun ham mantiqiy qadam sifatida baholanmoqda: fransiyaliklar hujum chizig‘ini kuchaytiradi, madridliklar esa yosh iste’dodga doimiy o‘yin amaliyoti yaratib beradi.
Shartlarga ko‘ra, Endrik mavsum oxirida, yozda yana “qirollik klubi” safiga qaytib qo‘shiladi. Bu esa “Real Madrid” rahbariyatining unga bo‘lgan ishonchi saqlanib qolayotganini ko‘rsatadi. Klub yosh hujumchini uzoq muddatli loyiha sifatida ko‘rayotgani yashirin emas.
Ma’lumot uchun, 19 yoshli forvard joriy mavsumda “Real Madrid” tarkibida asosan zaxiradan o‘yinga qo‘shilib, bor-yo‘g‘i 3 ta uchrashuvda maydonga tushishga ulgurdi. O‘yin vaqti kamligi sabab, ijara varianti uning rivoji uchun eng to‘g‘ri yechim sifatida qaralmoqda.
Mutaxassislar fikricha, Fransiya chempionati Endrik uchun jismoniy va taktik jihatdan o‘sishga mos muhit yaratadi. Agar u “Lion”da o‘zini ko‘rsata olsa, yozda Madridga yanada tayyor va ishonchli futbolchi sifatida qaytishi ehtimoli yuqori.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
