2026 yilning ilk uchrashuvi «Al-Nasr» uchun omadsiz yakunlandi: Jidda shahrida mezbon «Al-Ahli» 3:2 hisobida g'alaba qozondi va poytaxt klubi chempionatdagi ilk mag'lubiyatini qabul qilib oldi. Uchrashuvda «Al-Nasr»ni markaziy himoyachi Abdulilah Al-Amri asosan qutqarib qoldi, hujum chizig'ida esa Krishtianu Ronaldu va sheriklari kutilgan darajada o'yin ko'rsata olmadi. Bu haqda euro-football.ru xabar beradi.
O'yinning dastlabki 20 daqiqasida «Al-Ahli» tezkor bosim bilan natija chiqardi: Ayven Toni 7 va 20-daqiqalarda ketma-ket gol urib, mezbonlarni oldinga olib chiqdi. Shundan so'ng «Al-Nasr»ni himoyachi Al-Amri o'ziga keltdi: u 31 va 44-daqiqalarda ikki bor aniq zarba berib, tanaffusgacha hisobni 2:2 ga tenglashtirdi.
Ammo ikkinchi bo'lim boshida «Al-Ahli» yana ustunlikni qaytarib oldi: 55-daqiqada Merih Demiral standart vaziyatdan boshi bilan aniq zarba yo'llab, uchrashuv taqdirini hal qildi — 3:2.
Mehmonlar qanotlarda juda ko'p xatoga yo'l qo'ydi. Said Al-Nasser, Sulton Al-Ganam, Navaf Al-Bushayl va Ayman Yahyo eng past baholangan futbolchilar qatoridan joy oldi: birinchi taymda «Al-Nasr»ning flanglari juda oson yorildi. Tanaffusda Jorje Jezush ikki qanotni yangiladi, biroq muammo baribir yechilmadi: Yahyo ko'p uzatmalarini manzilga yetkaza olmadi, Al-Bushayl esa uchinchi golda Tonini nazoratdan chiqarib yubordi va uchrashuv oxirida asabiy vaziyatda o'zini maydondan chetlatib qo'ydi.
Inyigo Martines ham ishonchsiz ko'rindi. U standart vaziyat oldidan qoidabuzarlik qilib jarima zarbasini “sovg'a qildi”, aynan o'sha epizoddan keyin «Al-Ahli» g'alaba golini urdi. Demiralning hal qiluvchi zarbasida ham Martines pozitsiyani boy berdi.
Ronaldu esa uchrashuvning eng ko'p tanqid qilingan qahramoniga aylandi. Standartlarda u to'liq ishlamadi, bir epizodda esa qo'l ko'tarib to'p maydondan chiqqaniga ishora qildi, holbuki o'yin davom etgan edi. Eng yomoni, hujumda ham Krishtianu o'z darajasida bo'lmadi: to'pni qabul qilishda qo'pol xatolar qildi, to'rt bor zarba berdi va barchasi nishondan chetga ketdi. «Al-Nasr» yangi yilni savollar bilan boshladi — bu faqat bir martalik sust o'yinmi yoki yangi salbiy seriyami.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
