Angliya Premyer-ligasining joriy mavsumida allaqachon yo‘lning yarmidan ko‘pi ortda qoldi va eng katta kashfiyotlardan biri hanuz «Aston Villa» bo‘lib turibdi. Material tayyorlanayotgan paytda Unai Emeri jamoasi turnir jadvalida uchinchi o‘rinda, peshqadam «Arsenal»dan olti ochko ortda bormoqda. «Aston Villa» haqiqatan ham chempionlik uchun kurasha oladimi — shu savol atrofida mulohaza yuritamiz. Bu haqda euro-football.ru xabar beradi.
Unai Emeri «Aston Villa» boshqaruvini 2022 yil noyabrida qo‘lga olgan. Ungacha birmingemliklar 15 yil davomida Yevropa Ligasi sahnasida ko‘rinmagandi, Chempionlar Ligasida esa 41 yildan beri qatnashmagan edi. Hozir esa klub ketma-ket uchinchi mavsum yevrokuboklarda o‘ynamoqda. 2025 yil bahorida inglizlar Chempionlar Ligasi chorak finaligacha yetib bordi: hatto turnirning keyingi g‘olibini bir o‘yinda yutishga ham erishdi, biroq ikki uchrashuv natijasida to‘plar farqi bo‘yicha imkoniyatni boy berdi. Emeri tizimli murabbiy: natija uchun unga vaqt va rahbariyatning to‘liq ishonchi kerak. Ehtimol, «Arsenal» va PSJdagi ishlarining kutilganidek chiqmagani ham shundan, Birmingemda esa hammasi iziga tushdi.
Premyer-liganing yangi mavsumi «Aston Villa» uchun og‘ir start oldi — dastlabki besh turda biror marta ham g‘alaba qozonilmadi. Hatto Emerining iste’fosi haqida gaplar ham chiqqan, ammo vaqt o‘tishi bilan vaziyat barqarorlashdi va jamoa keskin ravishda yutishni boshladi. «Sherlar» so‘nggi bor sentabrda durang o‘ynagan, shundan beri 21 uchrashuvning 18 tasida g‘alaba qozondi — ajoyib ko‘rsatkich. «Arsenal»ga qarshi 1:4 hisobidagi mag‘lubiyatgacha Emeri jamoasi 11 o‘yinlik g‘alabalar seriyasida ketayotgandi, biroq yirik hisobdagi yutqazish ham futbolchilarning ruhiyatini sindirmadi: o‘tgan shanba «Nottingem Forest» ustidan 3:1 hisobida ishonchli g‘alaba qayd etildi.
Endi chempionlik poygasidagi imkoniyatlarga o‘tamiz. Kuchli «Arsenal» va nihoyat o‘z ritmini topgan «Manchester Siti» fonida birmingemliklarning nafasi unchalik keng ko‘rinmasligi mumkin. Ammo bu mavsum «Aston Villa» avvalgilaridan farqli o‘laroq nafaqat o‘rtamiyona va autsayderlarga qarshi, balki grandlar bilan o‘yinlarda ham o‘zini dadil tutishni o‘rgandi. Birinchi davrada jamoa «Tottenhem», «Manchester Siti», «Arsenal», «Manchester Yunayted» va «Chelsi»ni mag‘lub etdi. Ya’ni katta oltilikdan besh raqib yengildi, faqat «Liverpul»ga yutqazildi.
Shu bilan birga, chempionlik poygasida hal qiluvchi omil tarkib chuqurligi bo‘lishi mumkin. «Arsenal» ham, «Manchester Siti» ham uzun zaxira o‘rindig‘i va katta maqsadlar uchun kurash tajribasiga ega. Rojdestvo atrofidagi zich taqvim «Aston Villa» uchun haqiqiy sinov bo‘ladi: agar Emeri shogirdlari shu oraliqda ochkolarni sochib yubormasa va yanvarda tarkibni kuchaytira olsa, chempionlik yanada yaqin ko‘rinadi. «Arsenal»dan safarda yutqazilgan o‘yindan keyin ham «Aston Villa»ni hisobdan chiqarishga erta: olti ochko — kritik masofa emas, oldinda mavsumning katta qismi bor. O‘n yil avval «Lester» resurslari uncha katta bo‘lmagan holda sensatsiya qilgandi — nega buni Emeri boshchiligidagi «Aston Villa» takrorlamasin?
“Zamin”ni Telegramʻda oʻqing!
