Londonning “Chelsi” klubi bosh murabbiy masalasida nuqtani qo‘ydi: Liam Rosenor rasman “aristokratlar” ustozi etib tayinlandi. Bu haqda klubning rasmiy sayti ma’lum qildi. 41 yoshli angliyalik mutaxassis “Chelsi” bilan 2032 yilgacha mo‘ljallangan uzoq muddatli shartnoma imzoladi.
Shu tariqa, Rosenor 1 yanvar kuni lavozimidan ozod etilgan Enso Mareskaning o‘rnini egalladi. Italiyalik murabbiy “Chelsi”ni 2024 yil iyunidan boshqargan va qisqa vaqt ichida sezilarli natijalarga erishgan: jamoa Konferensiyalar ligasi (2024/25) hamda klublar o‘rtasidagi Jahon chempionati (2025) g‘olibligini qo‘lga kiritgan edi.
Endi esa estafeta Liam Rosenor qo‘lida. U murabbiylik faoliyati davomida turli muhitlarda ishlab, tajribasini bosqichma-bosqich yig‘gan mutaxassis sifatida taniladi. Jumladan, Liam “Brayton” yoshlar jamoasida ishlagan, keyin “Derbi Kaunti”da faoliyat yuritgan va “Xall Siti”ni boshqargan. Shuningdek, 2024 yil iyulidan beri Fransiyaning “Strasbur” klubi bosh murabbiyi sifatida ish olib borgani ham qayd etiladi.
“Chelsi” muxlislari uchun eng qiziq savol esa bitta: Rosenor bu ulkan bosim, katta maqsadlar va yuqori kutilmalar ostida o‘zini qanday ko‘rsatadi? London klubida vaqt odatda tez o‘tadi — bu yerda natija ham, uslub ham, xarakter ham birdek qadrlanadi. Endi Rosenorning oldida yangi sahifa ochildi: “Chelsi”ni ushlab turish emas, uni yanada yuqoriga olib chiqish vazifasi turibdi.
“Zamin”ni Telegramʻda oʻqing!
