Angliya Premer-ligasining 21-turi Londondagi markaziy to‘qnashuv bilan yakunlandi. «Emireyts» stadionida «Arsenal» amaldagi chempion «Liverpul»ni qabul qildi va uchrashuv 0:0 hisobida tugadi.
Hisob ochilmagan bo‘lsa-da, o‘yin “sovuq” o‘tdi deyish qiyin. Maydonda kurash, zichlik va ehtiyotkor taktika ustun bo‘ldi. E’tiborlisi, ikki jamoa birgalikda darvozalarga bor-yo‘g‘i 4 ta aniq zarba yo‘lladi. Bunday statistika markaziy o‘yin uchun kam, lekin aynan shu fakt bellashuv qanday tarzda o‘tganini juda yaxshi tushuntiradi: har bir xatoning narxi qimmat, har bir qadam hisoblangan.
Mikel Arteta shogirdlari raqibni bosim ostida ushlashga urinishdi, «Liverpul» esa vaziyatni o‘qib, imkoniyatni kutdi. Biroq oxirgi paslar va hal qiluvchi zarbalarda aniqlik yetishmadi — gol bo‘lmadi, lekin intriga bor edi.
Durangdan keyin «Arsenal» ochkolarini 49 taga yetkazib, turnir jadvalida 1-o‘rinni saqlab qoldi. Eng yaqin ta’qibchi «Manchester Siti» esa 6 ochko ortda qolmoqda. «Liverpul» esa 35 ochko bilan 4-pog‘onada joylashib turibdi.
APL. 21-tur
«Arsenal» — «Liverpul» 0:0
8 yanvar, «Emireyts»
«Arsenal»: Rayya, Timber, Saliba, Gabriel, Hinkapiye (Lyuis-Skelli, 57), Subimendi, Rays, Edegor (Eze, 78), Saka (Madueke, 78), Trossar (Martinelli, 64), Gokeresh (Jezus, 64).
«Liverpul»: Alisson, van Deyk, Konate, Kerkez, Bredli (Gomes, 90+5), Gravenberh, Soboslai, Mak Allister, Frimpong, Gakpo, Virts.
Ogohlantirishlar: Trossar (12), Mak Allister (90), Martinelli (90+3), Konate (90+3).
Xulosa qisqa: gol yo‘q, ammo katta o‘yinlar shunday bo‘ladi — ba’zan bitta ochko ham “qimmat oltin”. «Arsenal» birinchi o‘rinni mustahkamlab oldi, «Liverpul» esa oldindagi turlarda o‘zini qayta topishi shart — aks holda yuqori pog‘onalarda “quvlash rejim” uzoqqa cho‘zilib ketadi.
“Zamin”ni Telegramʻda oʻqing!
