UFC prezidenti Dana Uayt promoushn tarixi davomidagi eng unutilmas va shov-shuvli jang haqida berilgan savolga javob berib, muxlislar orasida hamon katta bahslarga sabab bo‘lib kelayotgan to‘qnashuvni tilga oldi. Uning fikricha, bu masalada hech qanday ikkilanish yo‘q.
Dana Uayt ta’kidlashicha, UFC tarixidagi eng zo‘r va eng keskin janglar Jon Jons va Daniel Korme o‘rtasida bo‘lib o‘tgan. Ayni shu ikki jangchi o‘rtasidagi raqobat nafaqat oktagonda, balki undan tashqarida ham juda keskin tus olgan.
UFC prezidenti ilk bor ular MGM arenasida yuzma-yuz kelgan paytdagi voqeani eslab o‘tdi. Uning aytishicha, o‘sha paytda tashkilot bu holatni to‘liq nazorat qila olmagan. Asosiy maqsad jangchilarning bir-biriga tegmasligi va hurmat doirasida qolishi edi, ammo buni ta’minlash oson bo‘lmagan.
Uaytning so‘zlariga ko‘ra, Jons va Korme kabi jangchilar hurmatsizlikni his qilgan zahoti javob qaytarishdan tortinmaydi. Agar ulardan biri oxirigacha borishga qaror qilsa, bunday holatni to‘xtatish deyarli imkonsiz bo‘ladi. Shu jihatdan ham ushbu raqobat UFC tarixida alohida o‘rin tutadi.
Ma’lumot uchun, Jon Jons va Daniel Korme o‘zaro ikki marta oktagonga ko‘tarilgan. Qizig‘i shundaki, har ikki jangchida ham bittadan g‘alaba mavjud bo‘lib, bu raqobatni yanada qiziqarli va tarixiy qiladi.
Dana Uaytning bu bayonoti UFC muxlislari orasida yana bir bor Jons — Korme qarshi turishi nega afsonaviy hisoblanishini eslatib o‘tdi.
“Zamin”ni Telegramʻda oʻqing!
