“Real” tarixidagi eng ta’sirchan va samarali hujumchilardan biri sanalgan Karim Benzema Madriddan ketganidan keyin karerasini Saudiya Arabistonida — “Al-Ittihod” safida davom ettirmoqda. Ammo ko‘rinishidan, fransiyalik to‘purarning “qirollik klubi” bilan aloqasi baribir uzilmaydi.
Jurnalist Xorxe Pikonning ma’lum qilishicha, 38 yoshli Benzema professional faoliyatini yakunlaganidan so‘ng “Real” tizimida yangi rolda paydo bo‘ladi. Manbaga ko‘ra, u “Real”ning rasmiy elchisi maqomida ish boshlashi kutilmoqda. Bu vazifa — klub yuzi bo‘lish, rasmiy tadbirlarda ishtirok etish, brend va tarixni xalqaro maydonda targ‘ib qilish kabi yo‘nalishlarni o‘z ichiga oladi.
Aytilishicha, Karim klub vakillari bilan bo‘lib o‘tgan muzokaralarda mazkur taklifga ijobiy munosabat bildirgan va bu missiyani qabul qilishga tayyor ekanini aytgan.
Eslatib o‘tamiz, Benzema 2009–2023 yillar oralig‘ida “Real” sharafini himoya qildi va Madriddagi o‘n to‘rt yillik davrda 25 ta sovrinni qo‘lga kiritdi. Ular orasida 5 marta Yevropa Chempionlar ligasi va 4 marta Ispaniya chempionligi ham bor. U klub tarixida nafaqat gollari, balki hal qiluvchi pallalardagi sovuqqonligi, sheriklarini “ochib” berishi va yetakchilik xarakteri bilan ham alohida o‘rin egallagan.
Hozirda hujumchining “Al-Ittihod” bilan amaldagi shartnomasi 2026 yil 30 iyunga qadar belgilangan. Shu bilan birga, avvalroq saudiyaliklar Benzemaga 2028 yil yozigacha amal qiladigan yangi bitim taklif qilgani haqida ham xabarlar tarqalgan edi. Bundan tashqari, Karimni katta futbolga yetaklagan “Lion” klubi ham uni Fransiya chempionatiga qaytib, jamoaga yordam berishga chorlayotgani aytilmoqda.
Qisqasi, Benzemani oldinda bir nechta yo‘l kutyapti: Saudiyada qolib, kelishuvni uzaytirishmi, Yevropaga qaytishmi yoki faoliyatidan keyin Madridga — “Real”ning rasmiy elchisi sifatida qayta kelishmi. Bir narsa aniq: Karim qayerda bo‘lmasin, uning nomi “Real” tarixidagi eng yorqin sahifalardan biri bo‘lib qolaveradi.
“Zamin”ni Telegramʻda oʻqing!
